2016年9月28日 星期三

《九月終極一炮 の 希貓撞正講故王》

Chapter 1:特別的自拍技巧
喵~各位靚仔靚女你哋好!
今日就等我希貓CoCo嚟同大家講解一下自拍嘅重要性!

比人偷拍嗰陣我就係肥貓鄭則士……
當自拍嗰陣我就係電眼梁朝偉……
另外,有好多人都話我側面好似吳彥祖,大家點睇?喵~
以上笑話係由美艷動人嘅靚女Blog友Crystal姐姐所提供。
好!冇乜嘢我出返去食嘢先喇!喵~
呵呵~有你打頭陣我實放心啦!乖~跟住落嚟嘅時間就交俾我啦!

Chapter 2:Happy Birthday,dude!
嘩~呢幾個月真係特別多老友生日!先有柏盛,後有輝哥,再有華Dee!但由於近排大家都忙到甩轆,所以就一直都抽唔到時間出來聚聚……終於,喺上星期我就決定要清一清呢筆「飯債」!首先我就同盛盛去咗亞皆老街間《翠華》擦咗個下午茶!喂~伙記!咁耐冇嚟,點解啲嘢難食咗咁X多㗎?
之後,我就帶咗輝哥去佢最鐘意嘅《第尾牛扒》度鋸扒……
嗱~輝哥!希望呢一餐可以掙爆你個胃,
食飽飽,繼續做個職安真漢子!未來嘅嘢就未來先去諗啦!OK?
一出糧第一時間應該做乜?妖~仲使問!梗係要即刻帶我嘅好兄弟華Dee去食返餐好㗎啦!呢一間位於旺角染布房街15號嘅《鳴門魚市場居酒屋》,佢哋嘅鎮店之寶可以話係阿華嘅一生中最愛!哈~我當然明白!一個重口味嘅人就梗係鐘意食埋啲重口味嘅嘢!成件事其實係好合理㗎!係咪?我明!我真係明喎!呵呵呵呵~
登登登登~呢一碗就係傳說中食完會令到人升仙嘅「特盛三色海膽飯」!所謂三色即係三款嚟自唔同國家嘅海膽(包括北海道馬糞、加拿大海膽同埋韓國海膽),再加多一隻生雞蛋……嘩~真係極邪惡!極震撼!
相對嚟講,我呢碗「特上赤蝦海鮮飯」個味道就較為清淡!
再嚟一客貝柱刺身,嫩滑鮮甜又夠凍,認真Ichiban!
每次去日式料理店我都必定會點嘅汁燒原隻魷魚筒!(咦~乜句對白咁熟嘅?我幾時講過?)
喂喂喂~唔係下化?又飲?華Dee你個死仔係咪想我中酒毒?
嗯~好啦!見係你牛一,就嗌一罐酒精含量比較低嘅Fruit Beer頂住先啦!
哈~呢碟燒鱈魚乾用嚟佐酒簡直係冇得輸呀!

特別推介呢度嘅串燒比大家!熱辣辣又夠香口,極の好味!
喺呢度,衷心祝願我三位好兄弟喺新嘅一年裡面大家都身體健康、工作順利、事事順境、快快樂樂!

Chapter 3:Work Hard,Play Hard!
眨下眼,原來我喺呢間公司已經做咗有六年咁耐!睇住身邊嘅同事來來去去同食過無數件「散水餅」之後,我對於職場上嘅離離合合、散散聚聚早就已經司空見慣!至於我同而家呢一班新同事嘅關係暫時都算係幾融洽,久唔久我哋仲會成班坐埋一齊飲啖茶、食個包聯誼一下……
咦~似乎有人企圖想夾手夾腳嚟恰我呢個層層疊初哥喎!
哈哈~想偷我雞?好難喇!一舖就KO你哋!呵呵呵呵呵~
小精靈出沒注意!隨著《Pokémon Go》嘅熱潮越演越熱,
我都唔執輸!嗱嗱臨捉兩隻返屋企玩下先!
除咗呢兩隻大小精靈之外,
早排喺街度就無意中比我捕獲到一隻相當討人喜歡嘅迷你小可愛……

Chapter 4:九月觀影小記
片名:當這地球沒有貓(世界から猫が消えたなら)
導演:永井聰
主演:佐藤健、宮崎葵、濱田岳、貓
片長:103分鐘
級別:I
語言:日語
發行: UA Films、英皇電影
上映日期:2016-07-28
個人評分:★★★★

本片賣點:
一言難盡,歡迎點閱本人所寫的看後感←←←←


片名:屍殺列車(Train to Busan)
導演:延尚昊
主演:孔劉、鄭裕美、馬東錫、崔宇植
片長:118分鐘
級別:IIB
語言:韓語
發行:Edko Films Ltd
上映日期:2016-08-25
個人評分:★★★★

本片賣點:
韓式醃洋蔥、勇武大隻佬、吸睛大肚婆


片名:軍火狗(War Dogs)
導演:Todd Phillips
主演:Miles Teller 、Jonah Hill
片長:114分鐘
級別:IIB
語言:英語
發行:Warner Bros. Entertainment, Inc.
上映日期:2016-09-01
個人評分:★★☆(☆為半粒星)

本片賣點:
真人真事改編、Jonah Hill演技大爆發


片名:六弄咖啡館(At Café 6)
導演:吳子雲(藤井樹)
主演:董子健、顏卓靈、林柏宏
片長:103分鐘
級別:IIA
語言:國語
發行:20th Century Fox
上映日期:2016-09-08
個人評分:★★★☆

本片賣點:
改編自著名作家藤井樹的同名暢銷小說,
被台灣網友票選為「最想看到改編成電影的華文小說」,
是以一部以校園、青春、愛情來作糖衣包裝的沉重大悲劇。


片名:幸運是我(Happiness)
導演:羅耀輝
主演:惠英紅、陳家樂
片長:111分鐘
級別:IIB
語言:粵語
發行:英皇電影
上映日期:2016-09-08
個人評分:★★★

本片賣點:
第1屆、第29屆、第36屆香港電影金像獎最佳女主角惠英紅(攞唔到我切!)


片名:薩利機長:迫降奇蹟(Sully)
導演:Clint Eastwood
主演:Tom Hanks、Aaron Eckhart、Laura Linney
片長:96分鐘
級別:IIA
語言:英語
發行:Warner Bros. Entertainment, Inc.
上映日期:2016-09-15
個人評分:★★★

本片賣點:
真人真事改編,兩屆奧斯卡影帝Tom Hanks自《Cast Away》後最精彩的一次solo演出。


下期新片,波濤洶湧Eva Green!免費任睇兩星期!
鬼火咁靚嘅電影宣傳品,全球限量400對!

Chapter 5:Let's Go Shopping!
除咗以上呢六部電影之外,最近我仲喺《CD Wearhouse》意外搵到一套從來冇喺香港正式上映過但我自己又一直都好想睇嘅中國電影……
呢套《Dheepan》係我睇完Blog友V for Vincent嘅影評之後決定要買嘅!
上兩星期適逢係張國榮(哥哥)嘅60歲冥壽,於是,各間唱片公司就立刻借勢推出咗一批「搶錢系列」嚟掠水!實行要抽乾你哋一班「哥迷」嘅荷包!
呢隻《Leslie Cheung Legend Continues》係一張EP嚟,裡面收錄咗哥哥喺1999年完成錄音後就一直冇發表過嘅四首國語歌。坦白講,得嗰四首歌竟然都要買成$199……呢種擺明呃錢嘅行為我係絕對唔會輕易上當!
相比之下,呢隻《哥哥的歌》就抵買好多!呢張3CD精選輯有兩個賣點,第一就係網羅咗哥哥早年嘅多首經典好歌同埋一啲極品滄海遺珠,例如係〈分手〉〈不怕寂寞〉〈愛情離合器〉等等……第二就係收錄咗三首從未曝光嘅作品,當中就包括張學友當年唱過嘅〈飛機師的風衣〉,同埋〈冰山大火〉〈千山萬水〉嘅Studio版本。



聽住呢首歌,真係覺得哥哥好似從來都冇離開過我哋咁……
喂~點解你可以將啲歌唱得咁好聽㗎?


作為Celine Dion嘅忠實歌迷,莫講話法文專輯呀~就算佢喺未來推出德文專輯、俄文專輯、西班牙文專輯、印度文專輯甚至係火星文專輯,我同樣都係會照單全收!

Chapter 6:每天來點負能量



When the day is done~Down to earth then sinks the sun~
Along with everything that was lost and won~When the day is done……


最近我就好似鬼上身一樣,差唔多每晚都要聽過Nick Drake嘅唱片先至瞓得著……
請問五月天是咪有一首歌叫做〈傷心的人別聽Joy Division〉?
呢度有冇MayDay嘅歌迷?可以幫忙解答我呢個問題嗎?
講到悲歌,又點可以唔提下已故嘅「情歌王子」陳百強呢?貴為80年代粵語流行樂壇嘅代表性人物,佢當年唱過嘅情歌真係首首慘、首首灰、首首正!尤其係〈等〉〈煙雨淒迷〉〈偏偏喜歡你〉〈一生不可自決〉,嗰種哀怨纏綿實在唔係話你有唱功就唱得到!



我覺得陳百強嘅歌聲埋藏咗一份好獨特嘅憂鬱味道喺裡面,咁多年以嚟,從來冇一個歌手可以將佢嘅歌演繹得比佢更出色,證明Danny哥嘅個人魅力同歌唱風格絕對係前無古人,後無來者。

Chapter 7:世紀鹹濕歌王搲賓周
有一個秘密埋藏咗喺我心裡面廿幾年,嚟到今日,我決定要打破沉默將呢個童年陰影講出嚟比大家知!喺細個嗰陣,我曾經幫一個前輩級人物起過一個花名叫做「鹹濕歌王」,呢位歌手就係人稱「民歌王子」嘅Albert Au(區瑞強)。
嗰陣,我覺得呢位民歌王子成個人都散發著一種戀童癖嘅味道,明明係一啲好舒服嘅民歌,經佢一唱之後,呢堆歌就立刻會彌漫著一種令人寒到入心嘅詭異感覺……尤其係佢嗰隻首本名曲〈漁火閃閃〉,極其猥瑣嘅歌聲加上笑淫淫嘅眼神,彷彿就好似喺度氹緊啲細路仔剝褲咁,真係聽親都打冷震!



「嗱好乖乖瞓落床~除晒衫褲~小娃娃~你可知道~~」 
哎吔吔~~聽到呢度,我已經唔敢再聽落去喇!(^_-)

阿Albert叔叔,真係好對唔住!其實喺呢咁多年嚟……我都唔知點解一見到你就會有呢種感覺!喂喂~請問有冇人可以大聲咁同我講一聲:「朋友,你不是一個人!」

Chapter 8:亂噏一通利物經
嘩~近排利物浦嘅表現真係勢如破竹!自從爆冷輸咗比般尼之後,球隊好快就成功收復失地,並且越戰越勇,佢哋除咗先後擊敗近兩屆嘅英超盟主李斯特城同車路士之外,喺四日前仲輕輕鬆鬆咁以5-1大勝「地獄賽程」嘅頭關對手侯城,計埋上星期對打比郡嗰場聯賽盃賽事,不知不覺間,原來佢哋已經錄得四連勝嘅佳績。
Come On Boys!唔使驚!爸爸喺大廳!(設計對白)
高普自從喺2015年10月走馬上任之後,佢所立下嘅戰績又豈只令到倫敦淪陷咁簡單?喺上季,佢除咗帶領利物浦罕有地殺入兩項盃賽(歐霸盃、聯賽盃)嘅final之外,到目前為止,利記無論係入球數字、控球率同埋每場嘅平均衝刺時間、攔截次數都係冠絕整個英超!而喺今個球季嘅頭八場比賽入面,佢哋就總共射入咗24球波,成功打破球會之前所創下嘅百年開季入球紀錄。
入球雖然好鬼多,但失波就依舊多籮籮!喺過去嘅六場聯賽入面,球隊大大話話就已經失咗9球波,每場比賽都唔能夠保持清白之身到完場,情況真係令人擔心!我認為,如果利記立志要重返前列嘅話,就實在要好好正視一下呢一個纏繞著佢哋多年嘅致命缺陷,尤其喺防守死球方面就更加要落多啲時間同功夫去改善!另外,亦希望高普可以慢慢幫隊波辟咗陣海鮮味,唔好再成日劫富濟貧,儘早脫離「英超羅賓漢」之名。
不過,睇見而家隊波不斷進步,仲漸漸打出一個隊型,佢哋啲入球分佈平均咗,喺組織方面又越嚟越多樣化,而班球員似乎亦開始慢慢適應同執行到高普嗰一套極具體力化嘅迫搶戰術,正所謂「上下一心,其力斷金」,實在係可喜可賀!講真,一隊識得打整體戰嘅利物浦,我真係好多年都冇見過!
難離難捨想抱緊些~茫茫人生好像荒野~如孩兒能伏於爸爸的肩膊~哪怕遙遙長路多斜~~
「我不喜歡賭博,不太明白這些。我們現時只踢了六輪聯賽,是非常早階段。我滿意球隊的成績,但和季尾距離仍是漫漫長路。」被問及紅軍目前成為奪標次熱門,高普就有咁嘅回應。
的確,而家只不過係季初,實在不宜J得太多!正如我之前喺度都曾經講過,論執教水平,曾經為多蒙特贏得兩次德甲冠軍嘅高普當然是毋庸置疑!但要知道,現時英超爭逐日漸激烈,各支球隊嘅實力亦開始越來越接近……所以,高普要喺短期內帶領呢一隊千瘡百孔嘅利物浦再度登上Big 4位置,實在唔係一件容易的事。古語有云:「羅馬非一日建成」,真正嘅重建行動,並唔係一朝一夕嘅!因此,我認為我哋一眾球迷而家唯一可以做嘅,就係耐心等待球隊成長,千祈唔好諗住一步登天!先打好個根基,爭冠軍呢啲嘢不如就留返季尾嗰陣先再去諗啦!咁當然,我知道我一個人嘅諗法並唔能夠代表所有利迷,但喺度我真係好想不厭其煩咁再講一次:「無論未來幾年成績如何,我都十分慶幸利物浦曾經有過高普呢一個頂級教頭。」
高爸,睇X住呀!嚟緊仲有排你跌呀!我勸你都係嗱嗱聲搵返間大啲嘅眼鏡公司做sponsor啦!哈哈哈~
喂~查實你講X完未㗎?我有啲急屎呀!(設計對白)
好!暫時就講住咁多先!有乜嘢留返下次再傾!好唔好?
嘩~好囉!呢條口水佬終於都肯斷氣囉!我仲以為佢會講到2047添!(設計對白)

230 則留言:

  1. 喺聽日,我會加埋自己對一班紅軍球員嘅一啲評價落去利物經嗰度,敬請各位球迷留意!✌

    回覆刪除
    回覆
    1. 邊度邊使留名㗎!😂

      刪除
    2. 因工作忙嘅關係,要聽日先有得睇……

      刪除
    3. 冇問題,等你,工作要緊

      刪除
    4. 得一個lunch時間,暫時只係寫到咁多!今晚會寫埋自己對一班新兵嘅感覺,仲會同大家細數一啲坐喺後備蓄勢待發嘅後備兵,到時會考慮下另外開一個新post出!😉✌

      刪除
    5. 作者已經移除這則留言。

      刪除
    6. 睇哂 寫得好好 恭喜利物浦又贏一場

      刪除
    7. 多謝一龍兄,下場殺狗最重要!💪👺🐕

      刪除
    8. 真係好鍾意睇你分析球員,搞笑得黎其實D觀點又好中,特別係lalala,明仔同盧神,我真係好怕睇人哋寫戰術分析,我唔想睇波都變成咁複雜..

      刪除
    9. 我反而就幾鐘意睇,因為我自己寫唔出!😂😂😂

      刪除
  2. 我初時不喜歡陳百強,覺得他很嫩…如果嗰時有小鮮肉呢個潮語,相信佢當之無愧,嗰啲韓男都要企埋一便!
    另外,區瑞強個樣又真係幾假同懶作狀,又笑淫淫咁,可能呢個就係佢個logo 吖嘛!

    回覆刪除
    回覆
    1. 我有段時間都覺得陳百強唱歌有啲雞仔聲feel,唱現場又唔係好夠氣,但人越大就越覺得佢呢種演繹方式反而就更真實!或者呢啲就係所謂嘅人歌合一!

      刪除
  3. 你隻貓貓眼神幾古惑喎!

    回覆刪除
  4. 一出糧唔係請姑姑去食餐勁咩 , 你大鑊鳥XXD
    除咗"沒有貓"及港產片, 其他都好睇.
    有邊套未係本地戲院正式上過既中國片呀 ?
    歐瑞強真係好惡頂 ,講完 !!!

    回覆刪除
    回覆
    1. 姑姑睇到妳第一句實剷到我上天花板!😂另外,套中國片叫《山河故人》,哈哈~原來真係唔只我一個人對區瑞強有呢種感覺!😈

      刪除
    2. 太好lu!終於有人知道你d衰野!

      刪除
    3. 我都唔知對您幾好!係您唔知足!😬

      刪除
    4. 雷公天公龜公土地公壽星公也會被我所感動!😗

      刪除
  5. 利物浦喺高普領導之下,比以往可以用脫胎換骨嚟形容.你講得啱,除咗尾嗰幾隊,其他球隊實力差距並不太大,所以時不時有爆冷賽果.

    回覆刪除
    回覆
    1. 今季應該比較難會再有上季李斯特城呢種奇蹟出現!唯一一隊有機會爆出嚟嘅相信就係沉寂多年嘅昔日勁旅愛華頓,事關朗奴高文的確係有料!不過我自己就梗係希望喺今個球季能夠創造奇蹟嘅嗰隊波將會係利物浦啦!Philip兄,我哋利記同阿記一定要齊齊將曼聯踢出Big 4,等摩佬再落多次油鑊,然後曼聯就從此永不超生!

      刪除
  6. 我都睇咗《幸運是我》,局部好睇,局部好tbb。如果張繼聰同成套戲唔夾,拍社企果度好似拍宣傳片咁(同樣拍社福機構,許鞍華拍得真實好多)。兩個主角嘅相處仲可以拍多啲,男主角嘅改變可以拍得深入啲。
    陳百強唱情歌冇得輸,連唔特別喜歡聽情歌嘅我都fall in love with佢嘅歌聲。
    區瑞強果part笑死我。

    回覆刪除
    回覆
    1. 冇辦法!導演功力有限,男主角演技就係得咁多!講真,呢類題材如果交比Ann姐去拍嘅話,肯定又會再一次橫掃金像獎!最後我想講,我比嗰三粒星,其實有兩粒半都係屬於紅姐嘅!😆

      刪除
  7. 張陳百強CD好早就買了,估唔到現在仲買得到...
    歐瑞強算正氣的歌手,最好嘢係樣貌變化不大~~

    回覆刪除
    回覆
    1. 最後我冇買到呢隻一生紫愛,因為我覺得一隻二手CD要賣成差唔多兩舊水真係唔太抵!所以後期我就去另一間唱片鋪買咗一隻全新嘅陳百強6CD精選!區瑞強個人應該係幾正氣嘅!只係我自己心邪je!😂

      刪除
    2. 咁你又醒目,呢張一生紫愛冇收錄漣漪呢首經典歌,新的有成6張CD咪仲抵買...

      刪除
    3. 吓?乜原來冇嘅咩?我都冇留意到添!😮

      刪除
  8. 哈,最邪惡既嘢都俾你地食晒 XD

    回覆刪除
    回覆
    1. 唔係呀~炸雞髀配炸薯條、厚切黑毛豬午餐肉+太陽蛋配出前一丁同黑牛都未出場!😈😂😜🍗🍟🍳🍔🍺

      刪除
  9. 暫時算收貨,般尼果場打和都算,輸左就差D,由第一場到而家,隊波打得咁順嘅主要原因除咗係逼搶同發動方面,最重要係買賣球員呢PART做得好,清走D不需要嘅,買返來的岩用又適應得快,今季我要求唔算高,希望可以爭到前四+一項本土盃賽冠軍,然後先會進取一D諗下聯賽!

    回覆刪除
    回覆
    1. 其實而家隊波嘅中前場大部分都係用返羅渣士嗰陣嘅骨幹,只係喺高普嘅調教之下,個個球員都好似開始漸漸搵返自己個定位,尤其係拉蘭拿同費明奴!不過我自己對今季嘅期望就依然唔會太高,始終後防個問題都仲未話完全解決到,希望卡利奧斯呢個靚仔龍門可以好好把握呢次機會打好啲!早日解除「晏菲路必出神經門將」呢個千年魔咒,千祈唔好令到我哋失望呀!

      刪除
    2. 雖然靚仔上一場係打得好差,但話晒高爸駛咗錢買佢返來,點都要用佢繼續試試,試多陣覺得真係好差,先至可以轉返米仔。唔係睇見佢靚仔所以幫佢講野,佢話晒初來英超,當年迪基亞第一年都成日派膠,嗰陣我都成日恥笑曼,到呢幾年,就變咗若不是迪基亞系列。所以,我贊成要再俾時間卡仔去適應英超球風先..

      刪除
    3. 完全認同鐸兄所講,冇任何嘢要補充!😆

      刪除
  10. 同埋你對D朋友真係好好,請食飯永遠唔手軟,仲有我勁鍾意Chapter 6,傷心的人別聽Joy Division呢個名真係超正,好有共鳴,Danny仔D歌我每次聽都會喊,尤其係佢果隻眼淚為你流,區瑞強果part真係笑到我有腹肌,大哥,你不是一個人!呢篇嘢真係好多金句,睇得我好開心

    回覆刪除
    回覆
    1. 喺呢個咁現實嘅社會入面,仲會有幾多個真心朋友呀?有就梗係要好好珍惜同對佢哋好啲啦!你話係咪先?😆

      刪除
  11. 聽左幾次哥哥嘅飛機師的風衣, 勾起好多回憶呀
    我都帶左隻陳百強過來呀, 我鐘意佢首不再問究竟

    回覆刪除
    回覆
    1. 佢真係完全唱到歌詞裡面想表達嘅嗰種feel出嚟!👮✈

      刪除
  12. 嘩 ! 希貓仔讚我靚女ar~我好開心ar~直程係心花怒放呀而家 ~😍😂
    Co喵~第三張相你真係自拍得好英~迷死人~~~ 😍😍
    我都覺得你側面確係有d似Daniel, 不過你最似ge就始終係朝偉 ~😜

    碗海膽飯真係好鬼邪惡~靚仔你放上黎完全係靠害 !!!😡
    喂有冇機會寫番篇Danny呢 ? 我好想再睇多d你對佢ge深入分析~👍

    阿咸濕歌王果part真係笑到噴飯~
    點解你可以將件事形容得咁繪形繪聲ga ? 真係服得你好交關~~🙈

    岳少同薯片叔叔張相真係睇一次笑一次 !!! 👅

    回覆刪除
    回覆
    1. 希貓有話兒:我CoCo有一個優點,就係淨係識得講真話!😽
      我本人解答:未來應該係會寫一篇關於陳百強嘅音樂文章,但我答唔到妳係幾時……😅

      刪除
    2. 猫仔你口甜舌滑ar~~😚😜
      吓!又要等mood到先寫ar靚仔??😕😑

      刪除
    3. 最近少咗啲動力去寫文,不過我會儘快搵返番嚟!😆✌

      刪除
  13. 由杜sir開始講左咁多年既pass and move,
    今年終於做到似啲樣,
    區瑞強段野放上高登應該會成為潮文

    回覆刪除
    回覆
    1. 公平啲講,其實喺渣哥教嘅第二季隊波已經係接近做到呢樣嘢,雖然有好多人話佢乜都係靠阿蘇!

      刪除
  14. CoCo,you have beautiful eyes.I really like it.

    Sully is superb! Featuring Tom Hanks channeling the pilot known as this! Clint Eastwood creates yet another Oscar worthy film!

    Albert Au...Goddamn!!!you're so funny man!!!

    回覆刪除
    回覆
    1. Tom Hanks、Clint Eastwood應該至少會有提名啩?

      刪除
  15. 山河故人百老匯電影中心咪上過囉,我有睇
    最近睇咗套死亡習作一咒怨森林,係全宇宙最垃圾戲😰

    回覆刪除
    回覆
    1. 吓?乜原來有正式上過嘅咩?😲係幾時嘅事?😦係咪淨係上咗好短時間同好少場次?😰《死亡習作之咒怨森林》……真係淨係聽個名都知道係套垃圾嚟!😂👻💀

      刪除
  16. 你隻貓眼睛好大。
    你講區瑞強個段好好笑,咁都俾你諗到,我以前聽佢唱歌,都有啲打冷顫。

    回覆刪除
    回覆
    1. 哈哈~真係估唔到有咁多人會同我有同一個感覺!😂👀

      刪除
  17. 可愛的希貓,自拍同偷拍都咁靚呀!

    回覆刪除
    回覆
    1. 佢就係傳說中嘅零角度美男!😼

      刪除
  18. 咦你好衰㗎,寫區瑞強個Chapter圖文並茂都算啦!仲要改埋歌詞有埋youtube片,死啦!你搞到我而家聽loop親呢首歌都會覺得怪怪地,喂你好還番啲童年回憶俾我喎~哈哈,不過見有貓貓寫真同海膽大放送睇就放過你啦 XDXD

    回覆刪除
    回覆
    1. 我只不過係實話實說,真係好對唔住!😂

      刪除
  19. 迷你小可愛係俾人遺棄㗎??

    回覆刪除
  20. 謝謝分享! 非常精彩的記叙文章.

    回覆刪除
  21. 我細時覺得區瑞強好作狀,不過依家覺得佢真係好有實力,我仲會聽佢在二台個節目。

    回覆刪除
    回覆
    1. 其實我以前成日都會聽佢個節目《靚歌再重聚》!😂😂😂

      刪除
  22. 呢一篇除咗啲正嘢食之外,就正就係Coco了

    回覆刪除
  23. 兄弟估下我係邊個?2016年9月29日 上午9:34

    多謝曬我既好兄弟,無時無刻都咁撐我

    回覆刪除
  24. 你好苦悶呀?又寫咁多野!

    回覆刪除
    回覆
    1. 每年年尾啲靈感就會有如萬馬奔騰咁湧出嚟!💩

      刪除
    2. 哈哈~我哋真係心有靈犀喇!我而家真係坐喺個屎坑度回您㗎!😗

      刪除
    3. 我真係覺得你越望越似隻臭雀

      刪除
    4. 同妳似黑妹妹係一樣道理!重點係啲表情!🐓🐔

      刪除
  25. 特盛三色海膽飯, 好吸引, 吃時分瓣到原產國嗎? :D

    回覆刪除
    回覆
    1. 餐牌寫乜我咪唯有信乜囉!😜🍣🍱🍲🍹

      刪除
  26. 區瑞強一段認真是一絕,我差點笑到哭出來了。那碗三色飯真是人間極品,相信誰都會愛上它。

    回覆刪除
    回覆
    1. 我自己就唔係太識欣賞!😅

      刪除
  27. 其實今季成班波睇落係有d似13/14衝冠果一屆,球隊有實力,前線配合好,同時又冇歐戰包袱,我相信只要一直保持穩定嘅演出同一路keep個排名響頭5名内,到尾段d列強踢到殘殘地,而如果我們又冇乜嚴重嘅傷兵問題,到時我地既機會就嚟了。

    回覆刪除
    回覆
    1. 而家我係比較擔心1月,文尼要踢非洲盃!⚽🏃同埋後防同門將呢個問題仲未話完全解決到!😟所以我依然唔係咁樂觀!😅

      刪除
    2. 要睇下球隊有冇實力升返上BIG 4甚至係爭冠,聽晚作客對史雲斯場波絕對係關鍵!☝☝☝

      刪除
    3. 暫時算收貨,打出迫搶既侵略性,同時點點頭開花,比謝四、呀蘇在陣時更有組織,防線可以慢慢執,只係打左幾場,今年目標保前四,下場贏獌會更滿意,以今年買人有錢賺相信高普下年應該可以帶領我地更上一層樓!!

      刪除
    4. 但而家拉蘭拿傷咗,下場我有啲擔心,希望史杜可以爭返啖氣打好啲!

      刪除
  28. 當這地球沒有貓其實應該搵你隻貓去拍,佢咁多表情,實拎梗影帝!

    回覆刪除
    回覆
    1. 佢喺貓界已經攞咗十年影帝㗎喇喎,你唔係唔知呀?😾😼

      刪除
  29. 咁多兄弟生日 , 梗係要食飯慶祝吓啦 , 見到你啲相 , 一定食得好開心呢~!!

    回覆刪除
    回覆
    1. 同好朋友一齊食乜都咁好味!😆✌🍲🍛🍣🍕🍝🍱🍜🍻🍶

      刪除
  30. 很精彩的一篇,包羅萬有,笑料、貓咪、足球、美食、電影、音樂盡冶一爐。

    回覆刪除
    回覆
    1. 擅自引用咗俗流兄一句說話,在此先跟你說聲抱歉!🙏

      刪除
    2. 引用什麼說話?在哪個章節?為什麼我看不到?剛看完你整篇波經,你寫得很有趣,我看得很歡樂,最後祝你旅途愉快。

      刪除
    3. 翻查後才發現我原來刪除了那句說話,起初初稿的時候是有的!😅

      刪除
  31. 在下覺得無論是陳百強抑或是歐瑞強、兩人都對音響有着一份強烈堅持。

    回覆刪除
    回覆
    1. 陳百強唱歌比較隨意,區瑞強唱歌比較著重聲線同音準。

      刪除
  32. 我已經俾coco電死咗la。。。(>﹏<)。。。

    回覆刪除
  33. 新post已出!用多個早餐時間終於都寫好哂呢篇長波經!
    歡迎各位朋友繼續入嚟傾波經、傾歌經、傾戲經、傾食經……繼續一齊發神經!⚽🏃🎥🎧🍣🍲🍱🍥🍢🍡🍕🍝🍟🍗🍔🍦🍎🍌🍏🍇🍉

    回覆刪除
    回覆
    1. 辛苦哂!!寫得好精彩!!!

      刪除
    2. 其實我自己唔係幾滿意,因為只係用咗唔係好多時間去寫,寫到最尾幾個球員就開始有啲hea hea哋,然後就求其幾筆寫埋佢就算!哈哈~😂

      刪除
    3. 拜讀過整篇經文,一如以往風趣幽默抵死觀點又獨到入肉,讚!

      刪除
    4. 只係亂咁噏,冇祕笈!😂😂😂

      刪除
  34. 祝旅途愉快,期待你的東京遊記,亦很想看你寫Danny。

    回覆刪除
  35. blog主,個靚仔龍門睇嚟唔係好掂喎,會唔會得個樣架??

    回覆刪除
    回覆
    1. 第一場je!但我記得米仔第一場係打得好好仲救咗個十二碼!😂😂😂

      刪除
    2. 唔應該咁快放新仔門將打正選,始終缺席季前熱身賽
      後防球員未夾過,溝通同默契欠佳,真係要諗諗繼續正選定點

      刪除
    3. 感覺上高普嚟緊應該會繼續出佢,話晒都係自己班底嘛!

      刪除
  36. 一句講曬,你瓣瓣精。講完。閣下件件都走在時代尖端,唔輪到我答嘴😀。

    回覆刪除
    回覆
    1. 過獎了華兄,論文筆我和你、Siu兄、阿姨還差得遠呢!😅

      刪除
    2. 今天一覺醒來,見到Teddy好謙虛,哎吔!搵埋我做擋箭牌添。輪到我滴汗了!

      刪除
    3. 阿姨,我只是實話實說,我實在沒有什麼寫作天份,每當寫文寫到有點腦部閉塞就會有這種感覺……😅

      刪除
    4. Teddy 長寫長有,靈感如泉湧,每一篇都好豐富多姿,雖然口語很生活化。
      看過你寫的記事文章,好感性又富於文彩,我自嘆不如呀!

      刪除
  37. 我比較鍾意睇你隻貓貓。

    回覆刪除
    回覆
    1. 佢嘅魅力實在太難令人抗拒喇!😻😽

      刪除
  38. Didi nice trip~~~記得買手信~~~~~✋

    回覆刪除
    回覆
    1. 一定唔會少得妳嗰份啦!😆😆😆

      刪除
  39. 米拿,佳尼防守係可以,由其米拿,但米拿有好多傳中波都唔到位,佢好勁,扭甩對手單刀入禁區,但又係傳到好差,傳落文尼腳後,我吊到樓下都聽到,好認同你所講,佳尼真係穩陣,但進攻上,佢真係唔掂,所以利記攻勢集中米拿果邊多!!

    回覆刪除
    回覆
    1. 佳尼可能係個狀態未回復返啫!佢以前喺修咸頓年代連遠射都有!👊

      刪除
  40. 仲有尋晚我睇到Karius打成咁真係超失望,唔好話有功,基本龍要做的都做不好,感覺佢好似在意自己髮型多過撲波,唔知佢打完九十分鐘會唔會即刻check下件衫有沒有污積呢?心態真係太差,全冇投入感,呢一點米仔好得多,但佢上年話哂都係由FIFA選出來的德甲第二龍,而且佢只得23歲,所以現階段我地就唯有繼續相信高普眼光啦!…

    回覆刪除
    回覆
    1. 我反而一直都覺得利記嘅守門訓練一定有出問題,冇記錯好似Reina嚟咗幾年之後球隊開始就轉咗龍門教練……🙈⚽🏃

      刪除
    2. 至於個靚仔龍門我對佢都仲係幾有信心嘅!高普睇中嘅人基本上好少會甩轆!☝

      刪除
  41. 狂小子,祝你旅途愉快,玩得開心啲

    回覆刪除
  42. っˆヮˆ)っ眨吓眼時間過得好快嚟・゚。我瞓醒喇🐈
    好友♦・゚☼黃昏好&傍晚好☁*`☀╠╣aΡpy星期曰啦

    回覆刪除
    回覆
    1. ☁*¨*☆好友★。゚☾晚安♦・゚✬╠╣aΡpy星期一

      刪除
    2. 我瞓醒喇♥。゚❤眨吓眼又╠╣aΡpy星期一喇喂
      好友♦・゚☼早晨&午安好&黃昏好&傍晚好☁*`☀
      我回覆完大家*`又出門去玩貓&買餸菜&逛街樂

      刪除
    3. ☁¨*♦好友☾。゚★甜夢安睡☆・゚✬週二╠╣aΡpy

      刪除
    4. 作者已經移除這則留言。

      刪除
    5. 作者已經移除這則留言。

      刪除
    6. thx my friend!💕💕玩貓貓咁開心?😻😻😻

      刪除
    7. 玩貓貓超開心☁¨*♦好友☾。゚★乖乖瞓覺嚟
      眨吓眼又╠╣aΡpy週三☆・゚✬晚安

      刪除
    8. 好友★。゚☾安靜進甜夢♦・゚✬晚安☁*¨*☆╠╣aΡpy週四

      刪除
  43. 我比較喜歡張國榮的飛機師的風衣,那種隨意的味道好有畫面感。

    回覆刪除
  44. 狂兄,先祝你旅途愉快,玩得盡興,滿載而歸。
    六弄咖啡店的確有驚喜,比那些年好看多了,最難得是竟然可以將顏卓靈拍得那麼好看。紅姐今年金像獎應該肯定冇走雞,完全係桃姐級演繹。
    柏鳥小姐就一貫添布頓水準,Eva Green在戲中簡直就係女版Johnny Deep,睇見佢著得咁密實真係唔係好慣。
    世紀咸濕歌王,俾你笑死,好耐冇試過笑得咁開懷,哈,多謝哂。

    回覆刪除
    回覆
    1. 多謝徐大導,我覺得紅姐唯一嘅暗湧就係本身套電影拍得比較平庸,所以,我相信佢一個人要喺香港本土掃曬啲獎項應該係冇難度!但如果要好似Deanie姐咁揚威海外應該就困難啲!

      刪除
  45. 陳伯強唱的歌好冷靜富於情感;歐瑞強唱歌很有誠意。區曾經努力給機會與其他的新人。
    可能他有時說話太主觀與陰柔,得罪了別人也不知。

    回覆刪除
    回覆
    1. 阿姨形容得好好,陳百強種唱法就係喺冷靜中流露一份好巨大嘅情感出來!🎤🍃

      刪除
  46. 聽說, 翠華管理層內烘, 運作受影響, 連食物都差左.....

    回覆刪除
    回覆
    1. 我都有聽我一個做廚房嘅朋友講過!😯

      刪除
  47. Time Is Changing,你真係一係唔出文,一出就一鳴驚人👍❗好耐都冇見過你會響咁短時間內一次過出兩篇BLOG..篇波經睇哂,好正〰寫得好有娛樂性之餘又有戰術分析,仲拆解哂利物浦班球員有乜優點缺點,萬寧加出場果度認真係正到無輪👍❗學上面有位朋友話齋, 你真係樣樣皆精,樂評影評波評甚至係食評都難你唔到👍❗

    響呢度先祝你旅程順利順心,玩轉成個Tokyo同gf食到滿肚腸肥,然後返來就放D手信上嚟比大家欣賞,即係開心大遊記呀😄❗

    回覆刪除
    回覆
    1. 多謝,其實都係亂寫一通!😅

      刪除
  48. 小哥 祝你有個開心既東京旅程
    好想攞對鞋番屋企 Albert果個Chapter笑爆咀

    回覆刪除
  49. 巴打咪成日咁鬼懶成年先出文,等叉死人but已成篇睇晒,寫得好好。史杜呢場繼續有傳球,雖然仍然仲有啲格格不入,但睇得出佢好努力咁投入緊,反而奧歷治變得心急,雖然只有十分鐘時間表現自己,但睇唔出佢有心投入。靚仔龍門........同米勞列一齊加油,加緊跳多啲,跳準啲。實際啲咁講,唔好諗住利記係天下無敵,場場都有頭由頭"禁"住對手踢到完場,強如巴塞/皇馬/拜仁都會輸波。有時對方踢得好,自己就會相對表現反色,咁係正常o既。如果幻想利記場場都可以踢到水銀瀉地咁輕鬆大勝對手,其實有啲不切實際,比啲耐性啲球員喇!

    回覆刪除
    回覆
    1. 因為而家已經越來越少人會願意入嚟交流討論,好多都係睇完就算!大家都轉移去玩其他嘅網上平台,喺香港,寫Blog呢樣嘢已經漸漸被淘汰,雖然我依然都會堅持繼續寫落去,但好明顯就冇以前咁大動力,每次都係有心情先寫,請見諒!😆

      刪除
  50. 嘩,碗海膽飯放到成座山一樣,真是極邪恶的超級兇器,すごい。
    你的貓咪一向表情多多很討人喜歡,可爱い 。
    與同事相處得來是很難得的,羨ましい。
    Joy Division,想不到你也愛聽,在香港已經很少看到有人提及他們,
    你不愧是一個名副其實的音樂百寶箱,素敵な。
    鹹濕民歌王子,你太幽默,ハッハッ。
    最後祝你們的東京之行會玩得盡情,儘管去吃過痛快吧!
    相信我,你一定會愛上日本這個地方,行っていらっしゃい,楽しいご旅行を。

    回覆刪除
  51. 東京、台北之旅玩得開心啲呀!!See You Soon!

    回覆刪除
  52. 希貓CoCo...好有演戲天份呀!哈哈哈.....

    回覆刪除
    回覆
    1. 話哂都係十屆貓界奧斯卡影帝喎!😼

      刪除
  53. 回覆
    1. 其實以咁嘅年紀嚟講,佢keep得真係好好!🎅

      刪除
  54. CoCo 第二幅相似龍珠超中的破壊神.

    回覆刪除
    回覆
    1. 哈哈~你講起又真係有啲似喎!😹😹😹

      刪除
  55. Very long script .
    CoCo is so beautiful !

    回覆刪除
    回覆
    1. 我有佢一成咁靚仔就好啦!😢😳

      刪除
  56. hey!本利物經好好睇,就連我呢個廠迷都要俾個100個good你點解你唔係廠迷?係我就可以睇下你點樣評阿記而家班波?出新post呢個安排好ar, 唔使我地班波迷成日都要拉上拉落睇得咁辛苦,亦好開心見到你同angry bird bb已經連成一體,恭喜你個blog除左希貓咪之外又多個生招牌,你遲D會唔會考慮将個網名改做狂小鳥time is angering呢?嘿哈<

    回覆刪除
    回覆
    1. 堂堂一個男人起個網名叫狂小鳥好似唔係咁好……( ̄▽ ̄)ノ

      刪除
    2. 我有位Blog友Philip CHU兄都係個資深廠迷,佢喺上面,你哋有時間都可以互相交流下!😆👍

      刪除
  57. Co仔你真係恃靚行兇啊~
    計我話你無論係人地拍或者係自拍都係咁靚仔~

    博主nice trip啊~

    回覆刪除
  58. CoCo靚靚喎,可以行 Catwalk!

    回覆刪除
    回覆
    1. CoCo嘅身型已經完全同Model界脫晒節,而家就只能靠演技取勝!😹😹😹

      刪除
  59. 呢篇同上面篇波經都寫得好盞鬼,好期待你嘅遊記blog

    回覆刪除
    回覆
    1. 👌✋✌✈🍣🍱🍲🍜🍥🍢🍡🍶

      刪除
  60. 旅途愉快牙Time Time,另外我好鍾意你呢篇blog種玩法,好有昆頓塔倫天奴feel,
    喂喂克勤首歌搵左好多重量級演員拍MV喎,你有冇留意?

    回覆刪除
    回覆
    1. 李克勤《一個都不能少》MV拍攝花絮及訪問
      https://www.youtube.com/watch?v=piKpF-cvkso

      刪除
    2. 有呀!雲集哂成班演技派!真有面子!🎬

      刪除
  61. 早晨小子,篇波經好正,一朝早睇完勁醒神,thx.祝你有一個愉快既東京之旅.

    回覆刪除
  62. 回覆
    1. 估計應該都會係一大堆食物相!😂🍣🍱🍙🍜🍲🍤🍥🍢🍡🍑🍶

      刪除
  63. 呢篇blog幾好呀,輕輕鬆鬆簡潔好睇,區淫魔個段笑撚到我噴啤頭先,頂

    回覆刪除
    回覆
    1. 寫長文實在太花眼力和精神,所以現在大部分時間都只會出這種小品。📝

      刪除
  64. 回覆
    1. 去完東京之後去台北睇演唱會!✌😆

      刪除
  65. 睇哂成篇,大致上認同哂你所寫,但想講米拿射十二碼d角度其實唔係咁好,中腰波好危險,但佢個勁度好夠有力,所以龍門捉到路都未必趕到

    回覆刪除
    回覆
    1. 但係米拿嘅心理質素好,夠冷靜又夠淡定,所以我對佢反而又幾有信心!

      刪除
  66. 巴打隻貓真係幾時都咁型棍#love#
    嘩碗海膽飯睇落真係好撚正呀喂屌[bomb]
    翠華野又貴又唔好食成撚日搞埋綽頭野
    夠膽死脆嫩紅茄拼農場直送蛋飯賣40尾
    屌你茄蛋飯都40尾食左曉痾金呀#ng#

    回覆刪除
    回覆
    1. 貪佢夠就腳咋!唔係早就唔幫襯佢!😬

      刪除
  67. 六弄咖啡館估唔到原來咁撚灰:~(
    主角都係唔係超靚仔靚女, 反而令套戲更貼地
    董子健好撚好戲#adore#
    小綠同阿智份兄弟情好正:~( :~(
    戴立忍既演出令部戲更上一層樓#adore#

    自己辛辛苦苦到台北見女朋友
    點知由頭帽到落腳指尾:~( :~(
    重要比條女話你已經不在了:~( :~( :~( :~(
    我自己無經歷過但我完全明白依種心情:~( :~( :~( :~(

    薩利機長呢套齋睇trailer就得啦:o)

    回覆刪除
    回覆
    1. 我淨係知戴立忍個款真係好撚似豹哥!🐆🐯😂😂😂

      刪除
  68. 區瑞強似戀童癖個度笑到仆街,巴打你點解唔放上高登[sosad][sosad]

    細細個成日聽老豆播陳百強,後尾去到初中,就開始對danny產生興趣
    我最鍾意都係佢D sad歌,有一生不可自決,漫長盼望,盼望的緣份等等
    無錯,佢唱快歌係唔夠慢歌好,但佢D慢歌真係好正,聽到我好多共鳴
    可惜宜家同輩既,無咩人識欣賞,同期既歌手,反而佢地會比較鍾意張國榮同家駒多D:-(

    回覆刪除
    回覆
    1. 因為陳百強嘅曲風喺新一代嘅年輕人心目中可能會較為有啲懷舊……

      刪除
  69. 今年猁後備席嘅實力係近年最強架喇,Can未有態,Grujic要時間適應姐
    你諗下以前Torres後備係N'Gog,謝仔後備係Spearing,而家已經好撚平衡[sosad]
    老母打中中打得好好,跌哂眼鏡但仲係唔覺得佢係猁記人[sosad]
    睇Echo話佳尼個膝頭好似係呢幾場不嬲傷傷地
    如果係真概話佢忍痛上陣跌少少watt都情有可原[sosad]
    龍門個位如果卡列斯都唔得,猁下季不如爭買祖赫特(個人好鍾意佢)
    不過卡列斯只係打左二場,希望黎緊佢得[sosad][sosad][sosad]

    回覆刪除
    回覆
    1. 所以而家諗返起,其實當年肥賓都真係幾堅,揸住咁嘅資金同兵源竟然將利記變成一隻喺歐聯人見人怕嘅不死鳥!👏👏👏

      刪除
  70. 狂兄,旅途愉快,波經睇左,勁正,冇得輸!

    回覆刪除
  71. 陳百強和哥哥是一代巨星,無人能及。

    回覆刪除