2015年7月10日星期五

好久不見

各位Blog友你哋好嗎?好耐冇見喇!消失咗一排……
喺呢度,我想同大家分享一下自己喺呢幾個月嘅一啲所見所聞、所思所想……

時間過得真快,一轉眼我今年就已經32歲,
非常感謝各朋友、家人對我嘅祝福,
無論係Facebook、WhatsApp、Wechat定係私信同親自致電都好……
特別係輝哥、鋒弟同姑姑一家人,
因為有你哋嘅陪伴,令小弟呢一年嘅生日顯得格外溫暖。
用咗接近四年嘅iphone 4s喺兩個月前終於宣布打柴,
取而代之嘅……係呢一部Galaxy Note 4。
點呀~個電話外套係咪好有型呢?嘻嘻嘻~
人越大,身邊嘅真心朋友就越來越少,唔知道有冇人對呢句說話深有同感呢?
好慶幸活到今時今日仲仍然擁有一班對我不離不棄並且兩脅插刀嘅知己良朋,
尤其係你,輝!坦白講,咁多年以嚟,我睇住一個個兄弟畀人鎖入監房,送入殮房……
心裡面確實係百感交集,到底呢個係我嘅宿命?定還是係你自身嘅不幸呢? 
好兄弟,我明白你件事去到而家已經開始進入法律程序,
所以喺現階段,作為局外人的確係唔應該發表太多個人意見,
我只可以講,無論將來發生咩事,就算你最後一無所有,都仲有我呢個兄弟!講完!
鋒弟,既然一切已成事實,不如就嘗試積極面對啦!
好似你二哥我咁呀~由細到大周身暗病咪照樣撐得過!
更何況前排我花咗啲時間去查下你個病啲病例,
先發現原來喺世界上仲有好多患有呢個病嘅人,
都依然係可以如常地工作、生活同拍拖……
只要喺飲食同日常生活方面多加注意一下就OK喇! 
咁當然你就一定要定期檢查身體啦!加油呀三弟!支持你!
人生總係有起有落,有悲亦有喜……
倪生,相識十幾年,總算都睇到你成家立室,真係真心替你感到高興啊!
Sandy,先預祝妳新婚快樂,希望妳同妳老公仔會一直長長久久、甜甜蜜蜜!
哈哈哈哈哈~我嘅好姊妹、好K友……早日生返個,得閒再唱過!
上個月去姑姑屋企做節,估唔到咁都會撞到我喺中學年代嘅最好朋友!
呵呵~龍兄,我哋兩兄弟認真有緣啊!
My bro~眨下眼你經已成為人哋嘅好老公、好爸爸……
衷心祝福你一家人永遠都快樂無憂、幸福安康!
喺未來嘅日子你要繼續努力搵多啲奶粉錢啊!知冇?
嘩~盛哥你條友仔呀!當真係唔聲唔聲嚇我一驚!你知道嗎?
聽到你呢個消息,你老哥我除咗感到老懷安慰之外,亦好替伯母感到高興!
老友,好多謝你送畀我嘅呢一份生日禮物!喺度祝你工作順利,All the best!
喂~我仲等緊你餐生日飯㗎!千祈咪走數呀你個衰仔!
能夠令我重拾酒杯嘅人真係唔多,
華Dee,你係其中一個,好兄弟,唔使講嘢!乾!
喺咁多位兄弟當中,華Dee一向都係最抵錫同最有我心嗰個,
佢為咗滿足我呢個壽司怪,經常都會四周圍幫我搜羅一啲正斗嘅壽司店,實在係唔話得!
話時話真係好期待今晚餐生日飯,極想知你所講嘅嗰間高級日本料理到底有幾正!
近年突然瘋狂迷上韓國菜,而位於我公司附近嘅《金媽媽韓國配菜》,
喺呢半年就成為我晚飯時間嘅指定飯堂,我覺得相比起隔離街間《韓點》,
《金媽媽韓國配菜》啲用料就比較新鮮啲,至少食完唔會令到我呢個「敏感人士」周身痕先!
喺食物款式方面,呢間舖同一般嘅韓國料理店基本上都係大同小異,
分別就在於《金媽媽》嘅食物製作模式就較為「住家」一啲,並唔係單純嘅快餐店機械式出品。
有好嘢梗係要預埋老友一齊共享啦!前幾日華Dee嚟我公司睇戲,我就特意請咗佢去《金媽媽》度開餐。
哼哼哈兮~~快食用雙截棍~哼哼哈兮~~
口痕其實又唔一定要食薯片、蝦條同朱古力嘅!
得閒整返條「善心大肉腸」,好味飽肚又滿足!
聽歌要聽林志炫,肉乾要食林志源!
好多謝阿媽嘅老闆成日都咁有心特登從新加坡買啲手信返嚟畀我!Terima Kasih!
經過一年嘅搏鬥同靜養,纏繞我多年嘅皮膚病到現時經已好返接近七成,
我好清楚呢種病係唔會有斷尾嘅一日,因此喺飲食方面就依然唔可以掉以輕心,
酒,我只會喺一啲好重要嘅場合先會飲,通常都係一杯起,兩杯止;
一啲煎炸食物同生冷嘢我只係間唔中先會破戒食下,
另外,喺呢幾個月我仲慢慢養成飲牛蒡茶呢個習慣,
講起上嚟,真係多謝晒好Blog友毛豆嘅誠意介紹。
由今年四月開始,我同姑姑私底下就定立咗多款唔同系列嘅遊戲嚟考驗大家,
例如係一個名為「14天不動氣」嘅EQ耐力遊戲。
熟悉我嘅朋友都知道我嘅脾氣向來都好暴躁,
要我呢個出晒名嘅火爆仔唔發脾氣十四日?簡直係Misson Impossible!
不過,我前排睇咗一部電影,個片名叫做《Wild》,
喺戲入面嘅幾句對白,就令我對人生有咗一番新嘅體會同啟發……
「在錯失風景,飽歷蒼桑之後,我找到了一條屬於自己的路。
過去的生活讓我懂了很多,還有那些你都不知道的東西。
我意識到自己可以繼續生活下去,美好的事物經歷太多,但永遠沒有盡頭。
我不知道一路向前將何去何從……不過,那些東西就是我的一切。」
以上係戲中主角Cheryl Strayed喺片尾所講嘅一段讀白。
回首過去,我幾乎每日都喺度為咗一堆芝麻綠豆嘅事而發脾氣,
塞車又暴走,便祕又暴走,點咗啲菜遲嚟又暴走……
直到上個月我重拾返步行呢個習慣之後,我個人就明顯比以前平和咗,
有時候做人就係咁,一個人行行下就會無啦啦諗通一啲嘢……
於是,喺幾個月前我就決定要出一個考題畀自己。
喺呢幾個月發生咗好多件令我好唔開心嘅事,
唔只係阿輝同鋒弟嘅單嘢,一班反轉豬肚、冷血無情嘅家人……
亦一度令我嘅心情跌落谷底,更令我對呢班禽獸徹底死心,
仲真真正正放低自己一直以嚟對「家事」嘅嗰一份執著。
當日,為咗還嫲嫲一個心願,我厚住面皮攞住個電話逐個打畀班姑姐姑丈,
一心想將呢一班本來已經四分五裂嘅家人團結起嚟,終於,我係成功咗……
但之後點呢?當件事完結咗,呢班因為我而和好嘅親人就立刻回復本來面目,
調轉槍頭隊我不特止,仲好高調咁將我老豆踢出Whatsapp個family group,
比較可笑嘅係,查實我老豆根本由始至終都冇裝過Whatsapp,
當日我加佢入group,只不過係情急之下唔小心㩒錯掣,
但冇諗過有人唔知頭唔知路就好心急咁衝出嚟柒,盡顯人性醜態。
呢件事令我再一次體驗到乜嘢叫做人情冷暖,
對上一次係十七年前我老母老豆欠債單嘢,搞到我眾叛親離;
十七年後嘅今日,為屋企捱生捱死捱到七癆八傷嘅我,
仲好天真咁妄想可以贏返自己一直以嚟都渴望得到嘅親情,
但事實證明我又錯咗,我一個人確實係冇辦法改變某啲人自私嘅本性!
當班仆街知我嫲嫲患上老人痴呆, 個個就爭住出嚟扮乖女攞光環,
以為咁樣就可以抹走晒當年所犯下嘅種種罪孽,
最離譜嘅係,某位日日喺我屋企搞風搞雨嘅陰陽外姓人,仲想趁住呢段時間繼續攞著數,
而我嗰班所謂屋企人見到咁嘅情況,竟然就選擇䄂手旁觀、助紂為虐,
咁都唔只!有某幾位禽獸家人仲多次企圖想迫害我一位患有嚴重情緒病嘅姑姐,
當我收到呢位姑姐send畀我嘅「求救訊息」嗰陣,我當時嘅心情直程係嬲到震!
你班滅絕人性嘅怪物因為同我老豆老母多年嚟嘅積怨而求其搵個理由圍埋杯葛我、孤立我、打擊我,
呢啲我都算喇!但我真係諗極都諗唔明,點解你哋就係都要不停咁去迫害一個受咗咁大傷害嘅屋企人
成日屈佢話佢會發癲斬人,又搞到佢日日都要一個人走出街坐幾粒鐘嚟避你班仆街!
喂~你哋到底想點呀?係咪要迫到人自殺先安樂?走去夾埋個外姓人搞自己人?
我屌你老味個臭化爛臭閪,你班禽獸究竟知唔撚知個「醜」字係點撚樣寫㗎?
之前你哋為咗滿足自己嘅操控欲而強迫阿奶入教,佢成個人病到五顏六色都仲要夾硬拖佢去受禮,
跟住仲離譜到搵人將我爺爺個神位當垃圾咁掉出街,你班閪女知唔知呢件事對阿奶造成有幾大嘅傷害?
阿奶之所以忍氣吞聲唔同其他人講,純粹只係為咗唔想一次過得失咁多個親人!
你哋呢一班假仁假義嘅死扒街,個阿媽健健康康嗰陣就日日都冷落佢……
好喇!家陣個阿媽患上老人痴呆唔記得晒你哋以前所做嘅衰嘢,就立刻個個狗衝出嚟扮聖人,
俗語有云:善惡到頭終有報,多行不義必自斃,你班友仔都係好自為之啦!小心十個耶穌都保你唔住呀!
呢幾個月所發生嘅事令我正式醒覺,我決定唔會再畀機會任何人傷害我,
因為我清楚知道,就算有一日我死咗,呢班人係肯定唔會為我流半滴眼淚,
喺佢哋心目中,我就只係一個用完即棄嘅避孕套,難過咗一個星期之後,
我得到返嚟嘅結論就係:「閒事莫理,聽完就撇!人家嘅事,關我X事!」
從今日起,我只會將所有感情同時間放喺一啲真心對我好嘅人身上,直到永遠,阿門。
數下手指,都接近有廿幾年冇食過一個屬於自己嘅生日蛋糕,
真係諗都冇諗過,平日咁低調嘅姑姑會為我製造一個咁大嘅驚喜,諗起嚟的確係有啲諷刺……
我15歲開始出嚟社會工作,為咗一個「家」字,我幾乎付出晒所有嘢……
然後活到今日,終歸畀到我最多溫暖嘅,往往就係一啲同我毫無血緣關係嘅人。
三十二年匆匆過去,最好嘅朋友、最尊敬嘅老師相繼離開人世;
最錫我嘅嫲嫲因為受唔住刺激而數度出入鬼門關,仲患上老人痴呆;
沉重嘅家庭負債、難纏嘅皮膚病、先天嘅眼疾,曾經令我痛不欲生,
到今日,我唔敢相信我居然可以靠住無比嘅力量同意志抵擋晒嚟自四方八面嘅攻擊,
我總算叫做對自己有返個交代。我由一個負家剷變成一個有六位數字積蓄嘅打工仔, 
老豆老母要做手術,我每次都係一個人搞掂,從來冇借過人一分一毫,
我擁有一班肯為我兩脅插刀、赴湯蹈火嘅知己良朋,我贏得一個願意為我默默付出……
仲入得廚房,出得廳堂同埋識得煮九大簋嘅絕種好女人,我真心為自己感到自豪。
琪,我應承您,從今以後,我唔會再執迷不悟,
我會好好咁生活下去,唔會再衰畀啲衰人睇!
希望喺未來嘅人生路途上,仍然可以有您陪伴在側。
好!肉麻嘢講完!又繼續講返我同姑姑之間嘅一系列互動遊戲!
除咗有先前所提及嘅「14天不動氣耐力大比拼」,
我哋仲玩過一個名為「禮尚往來」嘅交換活動,當中就包括「您請我食糖,我請鋸扒」……
您請我睇戲,我請您食壽司……
仲有就係我請您睇戲,您請我食拉麵、食雪糕。
講到玩遊戲,又點少得姑姑最鍾意玩嘅《Candy Crush》呀?
大家睇下我點樣狙擊姑姑個八月十五!呵呵呵呵
呢幾個月睇咗好多部電影,就等我嚟簡短寫返幾段觀後感啦!
呢套《五個小孩的校長》喺香港嘅票房直到目前為止已經突破四千六百萬,
仲成功打入香港華語電影累積最高票房榜嘅第十二位,真係認真厲害!
相信每個人睇戲都會有自己嘅死穴,而呢類販賣細路嘅溫情片就不嬲都唔係我嘅淚線催化劑,
所以到散場嗰陣有人見到我眼屎都冇滴,就即刻串我係一個極度冷血嘅人,
然後我抬頭望一望身邊嗰個人,只係隨口講咗句:「咦!妳喊呀?」
跟住就畀人打到重傷,仲差啲釀成血案!哈哈~但係如果撇除個人喜好嘅話,
我認為《五個小孩的校長》都算係一套誠意可喜嘅合家歡港片,
至於喺戲中飾演呂麗紅校長嘅楊千嬅亦為觀眾帶嚟佢從影以來嘅一次最佳演出,
而一眾實力派綠葉同一班小朋友自然樸實嘅表現,就成為整齣戲嘅最大亮點。
聽聞《赤道》原先個版本大概係拍咗三個鐘左右,
後來只係怕過唔到電檢先畀片商迫佢哋剪成兩粒鐘,
因而導致成套戲就呈現出一種眼高手低、冇頭冇尾嘅感覺。
作為陸劍青、梁樂民所執導嘅第二部作品,
《赤道》同《寒戰》一樣,喺結尾都好刻意咁舖咗條伏線出嚟,
可惜拍出嚟個效果就十分難睇,並且邏輯欠奉、含糊不清、犯駁連連。
演員方面,張家輝所飾演嘅李sir同佢之前喺《大事件》個角色就有少少相似,
都係一味橫衝直撞、瘋狂暴走,總之就撞板多過食飯。
若果只論演技,貴為兩屆金像影帝嘅張家輝就梗係冇乜大問題啦!
但以整體嚟講,佢喺齣戲度畀人個feel就好似有啲大材少用,
反而另一要角張學友所飾演嘅幕後大佬就為觀眾帶嚟好大嘅驚喜同新鮮感,
喺戲入面,唱而優則演嘅歌神展現其多變嘅演技,
充分演繹出「赤盗肇志仁呢個角色前後截然不同嘅性格特質。
講開又講,其實學友哥本來就係一個實而不華嘅演技派,
仲曾經贏過金像獎同金馬獎嘅最佳男配角,
嗯~我諗……可能係佢喺樂壇上嘅成就太出色,
先導致佢經常畀人忽視同遺忘咗佢喺電影上嘅優秀演出。
而除咗張學友之外,喺《赤道》令我留下深刻印象嘅……
仲有近年鮮有喺幕前演出嘅顧美華,佢喺全套戲裡面只係客串咗兩場,
但就戲味十足,神采依然,令人眼前一亮。
另外我想講,假若《赤道》仲會拍下集嘅話,
我就建議兩位導演可以同《寒戰》嚟一個Crossover,
大家試諗下!三大天王加上全港最好戲嘅梁家輝,
再搵埋發哥做赤盗嘅幕後老闆!嘩唔係講笑真係諗起都興奮呀!
阿根廷特色小菜 VS 豪華雜扒套餐,睇完呢兩部風格截然不同嘅電影……
我嘅感想係:只要有一個好劇本,哪怕只係一班癲佬傻婆都一樣可以勝過千軍萬馬!
關於《MAD MAX》呢部戲我只需要用五個字嚟形容,就係勁、癲、喪、好睇!
呢套《Tomorrowland》都算係迪士尼近十年最悶嘅一部科幻片,
但喺戲入面,年僅13歲嘅小童星Raffey Cassidy就表現可人,
完全搶盡男主角George Clooney同女主角Britt Robertson嘅風頭,
絕對有機會成為下一個Chloë Grace Moretz。
奉勸所有患有心臟病同高血壓嘅男士切勿入場觀看《加州大地震》,
原因係女主角Alexandra Daddario喺戲裡面極為「胸」狠嘅演出,實在係震撼得令人窒息
畫面:㊣㊣㊣㊣
劇情:㊣㊣
女主角: ㊣㊣㊣㊣㊣


假如有人覺得喺《San Andreas》嘅Alexandra Daddario係A級女神嘅話,

咁我認為喺《Jurassic World》嘅Bryce Dallas Howard就稱得上係S級仙女。

所謂嘅經典,就係可一不可再,不斷重拍,到底意義何在?一句到尾,就係錢作怪!
開講有話:世途險惡,人心難測,有時候,我哋間中都要匿喺光影世界入面休息一下。
下期猛片,不日上映,敬請各路影迷留意!
睇完咁多部電影,都係時候要嚟返個中場休息,
不如就帶大家去探下我喺公司新識嘅朋友仔。
同場加映,電眼美男梁朝貓輕鬆自拍。
《鐵達尼號》主題曲「My Heart Will Go On」作曲人James Horner
喺美國時間六月廿二號早上點半發生空難離世,終年61歲。
引用我一位Blog友Vincent Sun嘅一段說話:
「他的電影配樂作品,像Aliens、Apollo 13Ransom、Clear and Present Danger、
The Devil's Own、Braveheart、Titanic、The Mask of Zorro、A Beautiful Mind、
Avatar等那些我都印象深刻,他的配樂較柔和,尤其配一些愛爾蘭或世外桃源的音樂有味道
他配劇情片較好,之前Ron Howard、Mel Gibson、James Cameron都經常找他做配樂的。
無論如何,他的音樂已留在全球人心中。願他安息,R.I.P.。」
此外,有「The King of Blues」之稱嘅黑人男歌手B.B. King, 
亦喺美國時間五月十六日晚上九點四十分因為健康問題於美國拉斯維加斯逝世,終年89歲。
其多首名曲包括「How Blue Can You Get」「Nobody Loves Me But My Mother」
「The Thrill Is Gone」等,到今日仍然係為人津津樂道。
正所謂人有相似,名亦有相似!
我以前曾經一度以為國際名曲Stand By Me嘅主唱人係 B.B. King,
到後來我先知道,原來呢首歌嘅原唱者個名係叫做Ben E.King!
除咗 Stand By Me之外,佢為人熟悉嘅作品仲有「This Magic Moments」
「Save The Last Dance For Me」等等,呢位美國知名黑人男歌手同B.B. King一樣,
喺今年四月三十日因為健康問題於美國新澤西州逝世,終年89歲。



講到呢度,又同咁多位重溫一下呢一首膾炙人口嘅經典老歌。

「靚聲歌王」李克勤 +「樂壇天后」容祖兒,就咁睇個牌面係幾吸引嘅!
但佢哋喺十一年前嘅嗰一場拉闊畀我個陰影實在係太大喇!
兩把聲唔夾不特止,克勤當時個狀態仲要相當唔掂!
種種因素加加埋埋,就令我對今次呢個演唱會毫無期望,
不過又話分兩頭,佢哋兩個啲歌迷咁鬼多,我諗就算我想睇都未必會撲到飛啦!



乜嘢話?要打造一個不一樣嘅李克勤?嘩~校長,乜你咁大整蠱呀?
竟然作一隻會將克勤啲缺點完全暴露晒出嚟嘅歌畀佢?
仲要搵埋你上年首世紀膠歌「銀河歲月」嘅作詞人簡寧幫佢填詞?
講真嗰句,稍為die-hard少少嘅勤迷應該都會知道……
克勤自從開完04年嘅嗰一次《左麟右李》,把聲就即時廢咗一半武功,
以致佢後嚟每唱到一啲比較高音嘅歌都會出術用混音同假音輕輕帶過,
家吓你要佢全程用「實聲」去演繹一首歌,得出嚟嘅效果只有兩個字,就係「盞搞!」
我想講,阿勤哥,呢一類「爆seed歌」你喺星光時期都有一大堆啦!有幾不一樣呀?


《最愛潘源良是誰》作品展演唱會?豈有此理!點解我喺嘉賓名單嗰度見唔到「浪子」王傑……
亦見唔到「容易受傷」嘅王靖雯同埋「日本國家足球隊隊長」長谷部誠㗎? 
但係能夠喺一場演唱會裡面一次過睇晒Lam叔、Lam嫂、
譚校長同林憶蓮呢班歌王歌后嘅現場演繹,都算得上係值回票價㗎喇!
但可惜早排我就因為工作關係而miss咗呢一場「浪子詞人作品展」,唉~唔知出碟㖭㗎
最近我睇咗一本日本漫畫,個名叫做《少年犯之七人》,
呢本嘢故事緊湊,極之熱血,簡直就係男人的浪漫!
喺本書入面,「精神領袖」櫻哥對兄弟嘅嗰一份情與義直頭可以用「再世關公」嚟到形容,
雖然去到後期,本書嘅劇情就畀人有種誇張失實嘅感覺,但總括嚟講仍不失為一套好漫畫。
唉~睇到呢度,真係深有同感!(屌!唔該你條友唔好又扮浪子啦!)
而家有咗呢啲漫畫apps真係好鬼方便,
連呢套咁耐歷史嘅經典港漫都可以喺呢度搵得到!
講完戲經、歌經、漫畫經,又例牌講下我最愛嘅利物經!
經過一個極唔如意嘅球季之後,令利物浦幕後大老闆FSG痛定思痛,
決定要為球隊作出一次重大改變,勢要喺新一個球季再度捲土重來,
至於我對利記最近所簽嘅多位新兵有乜嘢睇法?
喺今個球季開咧之前又會有幾多個紅軍球員離開晏菲路?
上季球隊成績急速滑落,到底死因何在?受盡千夫所指嘅領隊羅渣士……
新一個球季又會點樣收復失地重振旗鼓呢?
以上問題,我將會喺下一篇Blog度深入咁同大家睇真啲!
波經講完,又同各位傾下時事政治呀!
唉~你個的士佬呀!反中亂港,正一係漢奸走狗賣國賊!
咦?望真啲……乜又係你呀吳生!乜咁啱呀!
世界大同,繼續包容,愛可以打破黑洞,愛可以化解一切。
同志們,既然黨那麼好,你們為什麼要逃離出國啊?
老實講,我一向都好憎呢一班成日嚟香港呃飲呃食嘅蛀米大蟲,
呢班蝗蟲嘅所作所為唔只影衰埋其他中國人,仲搞到呢個世界越來越醜惡,越來越污糟,
因為有你哋,大家開始對捐錢買旗做善事都有所顧忌;
因為有你哋,人類僅有嘅同情心就漸漸變得可笑同多餘,
哼!計我話,應該一次鎖晒你呢堆罪大惡極嘅垃圾入去恐懼鬥室互相廝殺就啱喇!
陳婉嫻?我細細個就聽過呢個龜婆個大名啦!
呢個賣港賊喺呢廿年嚟做做埋埋咁多陰濕嘢……
勢估唔到今次竟然會畀個肥仔搞到一舖清袋,
嫻姨呀嫻姨妳真係千年道行一朝喪,偷雞唔到蝕渣米呢舖真係抵鳩妳死囉!
香港,勝在有呢班低B!近日,多得呢一班濕鳩議員毫不保留嘅賣力演出,
為我哋一眾香港市民帶嚟無窮無盡嘅歡樂,呢種偉大無私嘅精神,真係令人感動流涕呀!
近幾年因為一啲私事、家事同身體問題而缺席咗好多個重要聚會,實在係深感抱歉,
但當睇到一班朋友、同學喺Facebook post出嚟嘅一啲結婚相、BB相,
除咗替佢哋感到高興之外,亦令我深深感受到,時間真係可以喺不知不覺間匆匆溜走……
喺呢一年,無論係我同身邊嘅朋友、家人各自都經歷咗好多嘢……
有見及此,我今年嘅願望同往年就有啲唔同,喺度我先衷心祝願我嘅三位好兄弟……
一位就平安無事,大步檻過,從頭嚟過;一位就早日走出陰霾,步向光明;
一位就戀運亨通,溝女成功!同時亦希望我自己、女友、朋友、家人、
同學同貓貓都身體健康、快快樂樂、平平安安,總言之就少啲天災,少啲人禍!祝福各位。
再次感謝施老先生嘅越洋生日祝福。
Yeah~Yeah~真係萬分期待十月嘅林志炫歌友聚會!
呢舖堅係「有炫千里能相會」!
喺嚟緊呢幾個月我一定要抽多啲時間好好練歌先得!哈哈哈哈哈~
提起台灣,十幾日前嘅「八仙水上樂園塵爆意外」就不幸造成三人死亡、近五百人受傷,
衷心祈望各傷者可以能夠康復,願逝者安息,生者堅強,亦希望各傳媒可以畀返個休息嘅空間佢哋。
最後喺呢度再提醒大家,巨星回歸,颱風將會陸續來襲,Blog友們記緊要鎖好門窗呀!
喵~講完未呀你?捨得吹蠟燭未呀?喵~
喂~貓仔!發叔都未到!等埋發叔先啦!
喵~仲等?我好肚餓呀!死人頭!咬死你!喵哎吔

183 則留言:

  1. 雖然「長篇小論」是你的作風,但我仍然看得很投入,很感動!

    回覆刪除
  2. 久違了, 企返係度, 確是很重要的. 補一聲, 生日快樂, 天天快樂!

    回覆刪除
  3. Happy birthday呀~祝你身體健康天天開心~你隻貓猫真係好得意呀!

    回覆刪除
  4. Happy Birthday~~~
    祝福你與姑姑有更美好的將來^^enjoy your life!!

    回覆刪除
  5. 真係久違了!!!
    無論幾難過的日子都好, 身邊總有值得你為佢而振作的人~~
    彼此努力啦!!!

    回覆刪除
  6. 祝福你﹗步行是福,姑姑同行,世上最美。

    回覆刪除
  7. 一排无见但见你都算过得精彩同甜蜜,替你开心嘎~

    回覆刪除
  8. 狂兄,多月不見,再次回歸,依舊長氣,依舊精彩,祝你生日快樂。

    回覆刪除
  9. 無見一排,各樣事都有如意同不如意,人生就係咁,總之有出現好過無出現﹗

    回覆刪除
  10. 生日快樂!陳婉嫻同的士佬果兩段閙得好好,睇到我拍爛手掌!!

    回覆刪除
  11. 終於浦頭了咩?!
    Happy belated birthday !!!
    又祝你否極泰來, 小人遠離, 同姑姑早日拉埋天窗 !

    回覆刪除
    回覆
    1. 謝謝毛豆,我不太習慣三星機所以少了寫文,現在漸漸熟習了!

      刪除
  12. 要去睇吓加洲大地震先得 :P

    回覆刪除
  13. 唔好等埋發叔喇,會出事架。

    貓仔真係好肚餓,佢忍唔住要咬你啫。

    回覆刪除
  14. DiDi多謝你~~諗通咪好lor~~~呢d cheap精根本就唔值得你去在乎~~~

    回覆刪除
    回覆
    1. 講到尾咪又係為咗阿嫲,唔係晨早唔忍啦!唉~

      刪除
  15. 生日快樂!
    雖然好長, 我都睇哂呀!
    你面對咁多問題, 都解決到, 仲有咩會難到你呢? 老土一句, 明天會更好

    回覆刪除
  16. 祝你身體健康!一切順利!要好好珍惜眼前人呀!

    回覆刪除
  17. 好久不見喇!高興知道你一切安好!
    在此補祝你生日快樂!身體建康!

    回覆刪除
  18. 追求健康、生活快樂你做了!戥你開心!努力啊!

    回覆刪除
  19. 迪哥再次祝你生日快樂!利記段文得一段既?唔夠喉wor!

    回覆刪除
    回覆
    1. 寫咗喇!仲要係再再再加長版!滿意未?XDXDXD~

      刪除
    2. 正又點你咁鬼耐先出一篇,等死d街坊咩?

      刪除
    3. 大佬冇收錢㗎!梗係有mood先寫啦!

      刪除
  20. 坐左咁耐潛水艇終於蒲頭
    你同姑姑的感情好好
    7月壽星仔,生日快樂

    回覆刪除
  21. Time Is Changing好耐唔見啦!祝你生日快樂,身體健康,有咁多人鐘意睇你個blog,你記住下次潛水唔好潛咁耐啦喎!我仲想繼續睇你D樂評影評波評同食評㗎!

    回覆刪除
    回覆
    1. 同埋想講你評李克勤首新歌真係評得好到point,首歌個曲色真係好old school,份詞又填得好老套仲九唔搭八,而克勤又唱得勁怪雞,證明呢種拆聲唱法根本就完全唔啱佢,只能夠講,譚詠麟,你真係out哂date啦!而家已經係2015年啦!

      刪除
    2. 哈哈~我承認我一向都係一個幾懶嘅Blogger……同埋通常都係有mood先寫!

      刪除
    3. 回埋你下一段,冇錯,首歌真係好唔掂,完全掩蓋咗克勤高、清、亮呢個優點!

      刪除
  22. 咁長篇一下子睇唔晒,mark低先慢慢睇

    回覆刪除
  23. 生日快樂!身體健康!繼續密密寫BLOG!

    回覆刪除
  24. 好久不見, 好嗎? 呢隻牛蒡茶, 我都有呀!

    回覆刪除
  25. 看着同學之輩結婚生子係好感動既事, 人人都努力長大 ...
    我也知道家家有本難念的經, 祝你平安!
    身體健康!

    回覆刪除
  26. Teddy:首先補祝你生日快樂!身體建康!
    "一個願意為你默默付出…仲入得廚房,出得廳堂同埋識得煮九大簋嘅絕種好女人"
    ....好容易比人搶走架!仲唔快D同姑姑早日拉埋天窗!唔好等埋發叔啦!:P

    回覆刪除
  27. 小子晚安,補祝你生日快樂,非常支持你繼續keep住步行呢個習慣,亦好開心見到你既EQ又昇華到另一階段,希望你會將會越來越好。add oil!

    回覆刪除
  28. long time no see ar ! 真係like爆你同姑姑ge果種互動~
    睇親有關你地ge故事同一d日常生活野都會覺得好好笑~~
    我完全可以想像得到你響佢面前應該會好似一個大細路咁~~~
    最後補祝你happy birthday ! 希望你同姑姑一日sweet過一日 !

    回覆刪除
  29. 早晨,Teddy!
    祝福健康愉快!

    回覆刪除
  30. 再次祝你生日快樂,下篇唔好寫咁長!hoho~

    回覆刪除
  31. 迪哥哥,好久不見,嘻嘻,,,

    回覆刪除
  32. 好耐冇見喇~哈~~我個女都出咗世喇~

    回覆刪除
  33. 補祝你生日快樂!身體建康!無論生活怎樣艱難,日日都要開開心心過生活!

    回覆刪除
  34. 祝喬生身心健康 , 我與姑姑同樣的支持你 ...!!

    回覆刪除
  35. 32咋咩?人生既黃金期家陣先開始,有阿琪伴著你,好好咁活在當下啦!

    回覆刪除
  36. 狂小子、你係得嘅、每編文章都包羅萬有精彩之至。所謂朋友有得揀、親人冇得揀、惟有盡量包容就是。祝愉快!

    回覆刪除
  37. 祝Teddy生日快樂!身體建康!日日都要開開心心過生活!

    回覆刪除
  38. 大哥我仲以為你以後會齋玩Facebook唔再寫Blog添!因為最近見你成日都喺嗰邊仲出相出得好密…講多一次,我其實真係好羨慕好羨慕好羨慕你每次一出post出相都有咁多人like,又有咁多人同你講生日快樂,你一睇我個Facebook,出乜都例牌冇人理,就連生日都冇人理!轉眼都同你做咗有五年以上嘅Blog友,喺呢度除咗再祝福你以後繼續健康快樂之外,仲好想多謝你一直以嚟嘅鼓勵同支持,有時仲會花時間打一大段文字去support我,我始終都冇你咁堅強,遇到難關就淨係識得龜縮,希望喺新一年我哋同利記都會越來越好,真係好多謝你呀狂小子大哥,YNWA!

    回覆刪除
    回覆
    1. 鐸兄你咪咁老套啦!正所謂利迷一家親嘛!至於寫Blog定玩Fb我就睇心情啦!但重點我都係會喺呢度,因為Fb應該出唔到咁大段嘢!哈哈哈哈哈~

      刪除
    2. 又係嘅...facebook始終唔可以打太多内心嘢....
      同埋最重要係我都係比較鐘意睇你寫文......

      刪除
    3. Facebook呢D都係分享下啲無聊嘢he!完全唔需要認真去對待呢個遊戲。

      刪除
  39. 補祝你生日快樂 , 人貓身心健康!

    回覆刪除
  40. 狂小子貓貓好耐唔見,補祝你生日快樂,貓肥屋潤。

    回覆刪除
  41. 生日快樂Teddy仔,今季繼續一齊撐利記!!!

    回覆刪除
  42. 祝福你們永遠甜蜜,廝守到老,十二年仍能保持一種倆小無猜的感覺,實不容易。

    回覆刪除
  43. Happy Birthday Teddy! 祝你身體健康,生活越來越順利!

    回覆刪除
  44. Happy Birthday。。。(=^・^=)
    我都唔like你最重要。。。好期待老孫作比Hacken首歌。。。*^O^*。。。

    回覆刪除
  45. 14天不動氣耐力比拼,有趣有趣!識得煮九大簋嘅絕種好女人,珍惜珍惜!祝你生日快樂,身體健康最重要。

    回覆刪除
  46. 好吧, 人生要好好去面對, 那就無愧人生了.,

    回覆刪除
  47. 估下我係邊個?2015年7月13日 上午8:02

    兄弟多謝你一切在心中

    回覆刪除
  48. 狂兄,好耐唔見,首先祝你生日快樂先!
    睇黎你近來出blog多少都係睇心情,希望仲有機會睇到你d樂評影評球評.
    「香港,勝在有呢班低B!」是blog最正金句,記底左!

    回覆刪除
  49. Long time no see buddy, happy belated birthday ! wish u all the best !

    回覆刪除
  50. 補祝你32歲生日快樂~
    人生有個真正朋友的確好極~~~~~你仲有咁多個~
    好好珍惜~

    回覆刪除
  51. お誕生日おめでとうございます。少年犯之七人這部作品雖然有點血腥和黑暗,但是也有讓人們有要堅強活下去的啟示。

    回覆刪除
  52. Teddy, 你出親都係大製作,佩服!佩服! 我對電影是門外漢,所以唔識回應。我對利記再度由羅渣士領軍,完全唔睇好,我估下一季唔會有大作為!史達寧終於求仁得仁,離開利記轉投曼城,但呢條友仔太過急功近利,屬早熟早殘一類,我估佢好快就會喺球壇上消失!

    回覆刪除
    回覆
    1. 我一向都平常心,成績高低都會默默支持。至於史達寧再唔改下自己嘅心態,一定會變成下一個胡禮菲臘斯!

      刪除
  53. 我15歲開始出嚟社會工作,為咗一個「家」字,我幾乎付出哂自己嘅所有嘢……
    然後活到今日,終歸畀到我最多溫暖嘅,竟然就往往都係一啲同我完全冇血緣關係嘅人。

    靚仔,睇到呢度好替你難過~~
    但亦慶幸你已經走出去仲有姑姑伴你同行~~add oil ar~~~

    回覆刪除
  54. 補祝你生日快樂,Bryce Dallas Howard老豆是名導,拍過《A Beautiful Mind》及《Apollo 13》。

    回覆刪除
  55. 生日快樂dude!上得大床嘅女人有好多,但入得廚房,出得廳堂仲識得煮九大簋嘅女人就真係絕哂種,一定要好好保存,哈。

    回覆刪除
  56. 生日快樂,好耐冇見la,睇黎你隻貓仔真係好愛你le,haha..
    wei wei..金媽媽D野好似好得咁wor..快食用雙截棍~哼哼哈兮~~笑死左....

    回覆刪除
  57. 咁耐唔見人 , 原來屋企發生咁多事 , 你今次真係要死心 , 唔好再對啲親人有期望呢~!!
    人生是 種經歷 , 是一個過程
    生活也從來不需要什麼手段
    簡簡單單 , 才能快快樂樂
    人生窄 , 窄在計算
    人生寬 , 寬在一念
    人活在世上 , 就是要追求快樂 , 快樂源自"放下 , 自在" , 不為旁人一句話而惱 , 不為他人一件事而怒 , 明白未?
    祝你同姑姑永遠都恩恩愛愛 , 活得開心~!! ^0^

    回覆刪除
  58. 狂小子,咁耐唔見,風格仲係依然! ~~
    一係唔出blog,一出就一定係包羅萬有!~~~
    喺度補祝你生日快樂,繼續寫多D到位幽默嘅影評同樂評,
    同姑姑早日拉埋天窗,我諗呢個都係大部分讀者好想睇到的結局,祝福你哋!~

    回覆刪除
  59. 補祝狂兄生日快樂,願快樂永隨你心中。陳婉嫻拍錯手掌、燒錯炮仗,這位在「十大議員」排名中由首名跌出榜外的「過氣票后」,已淪為一隻「和平可親文明」的無牙獅母。

    回覆刪除
  60. 巴打補祝你生日快樂,祝福你同姑姑呢段亂倫之戀可以早日收成正果[369][369]
    認真,睇你blog咁耐,總係覺得你個人頭腦好清晰但就有D過度重情義:-(:-(:-(
    呢個可能就係你識到咁多朋友既主要原因,但同時亦令你好容易比D唔好既人hurt到:-(:-(
    希望今次既事可以令你正式醒,因為呢個世界有D人真係唔可以對佢地有半點仁慈xx(xx(xx(
    Between,你同淫龍張合成相真係笑到我hihi [sosad][sosad][sosad]

    回覆刪除
    回覆
    1. 哈哈~你隻小強真係永遠冇句好嘢!我明㗎喇巴打,其實呢一年我已經改變咗非常多!btw,原來我同你&好多blog友已經識咗差唔多有6年,真係好難得啊!

      刪除
    2. 因為膠歌典禮認識到巴打個blog #good#
      後來仲意外發現原來你就係當年高登至膠廣告同膠歌頒獎典禮既元老#adore#
      仲早過刁民,再發現你係山口組成員,同姑姑亂倫,巴打你真係好傳奇#adore#
      真心講多次你係我最欣賞既blogger,風格好獨有#good#
      我最buy就係你真係為寫blog而寫blog,
      真心分享毫無商業味,呢點真係好難得#good#

      刪除
    3. 我寫Blog都係為分享,為舒發,世途險惡,有時候真係要間中用文字去發洩一下!用筆總比用拳頭好吧!哈哈~

      刪除
  61. 五個小孩的校長拍得幾好,全場不停比班小演員感動,尤其畢業禮同行雷果段:~( :~(
    套戲好平淡地帶出好多香港基層家庭既困難,我男人老狗都差d流馬尿:~( :~( :~( :~(
    楊千嬅不嬲好多膠戲但可能佢做左阿媽,今次又拍得幾好#good##good#
    珠女好靚,嘉嘉好好戲,可能有機提名最佳女配角,另外馮粹帆真係老左好多:-(:-(:-(

    同埋睇完套戲,真係好想為陳百強喝采#adore# #adore# #adore# #adore#
    一直好鐘意喝采呢首歌,套戲用呢首歌簡直係最好不過#good##good#
    記得好多戲都係用佢既歌,令我印象好深刻,無記錯既話金雞用左一生何求,
    初戀無限touch用左幾分鐘的約會,之前m club仲用左戀愛預告同埋深愛著你#love#

    總覺得佢既歌有好特別既味道,令人一聽難忘#love##love#
    同哥哥校長既歌比,完全係兩個風格,只可惜天妒英才:-(

    回覆刪除
    回覆
    1. 楊千嬅形象正面,呢類角色好啱佢發揮。班小朋友演技真係好自然,估唔到喺一套港片度竟然可以睇到一班演技咁唔做作嘅童星,你都知而家啲童星做戲幾作撞㗎啦!另外,喺呢套戲仲有一套爆點我你數漏咗……就係古天樂唱歌!哈哈哈哈~

      刪除
    2. 陳百強把聲係有一種好獨特嘅憂鬱味道,咁多年以嚟,從來冇一個男歌手演繹佢啲歌可以演繹到嗰種味道,佢係獨一無二嘅。

      刪除
    3. 有段幕後片好撚正
      係嬅嬸叫撚太撚係班細路面前唱今期流行,搞到古天奴想爆粗咁滯[369][369]

      刪除
    4. 我有睇過,楊千嬅個語氣好賤!XDXDXD~

      刪除
  62. 赤道我真係唔撚明點解咁多人話套戲有幫香港人發聲:o):o):o)
    基本上,成個行動既失敗都因香港警察而起,而香港警察由頭到尾都係到做緊蠢事:o)
    包括張家輝錯信赤道;張家輝唔信宋鞍放走左Janice Man;
    到張家輝懶係型單拖搵赤道傾計:o) 香港一方根本係愚蠢、幼稚既代名詞,
    而中國官就係由頭到尾,最清醒,最明察秋毫既個個#good#:o)

    我係港產片撚都係咁話,好撚失望,失望值仲超過竊聽3 xx(xx(xx(
    拍到好似旅遊雜誌但又營造唔到大片感,D劇情又鬆散又推進唔到xx(xx(xx(
    或者咁講個劇本根本好空洞,同寒戰真係冇得比xx(xx(xx(
    D服裝又奇奇怪怪好似科幻片咁,D暗串中港關係文戲又拍得好突兀xx(xx(xx(
    唯一好睇就係JANICE MAN:P,張學友表現最好,D韓佬同韓佬情節就好格格不入xx(
    好似一路睇緊傳統港片又無啦啦播段泡菜劇咁xx(xx(xx(xx(xx(xx(
    仆街你地都係拍左第2套戲,再係咁冇人會再中你伏xx(xx(xx(

    回覆刪除
    回覆
    1. 嗱!小強你就心水清喇!睇到好多都睇唔到嘅嘢!Janice Man真係漸漸洗哂以前陣MK味,只要佢唔好開聲!哈哈哈哈~

      刪除
  63. 送李雞容演唱會:o):o):o) 少年犯之七人真係好撚正,又熱血又感人:~(
    我睇完漫畫之後介紹比人睇,佢地又話咩好撚gay xx(,全部都唔明白套作品有幾正#fire#
    我自己就最中意義仔係洪水中教個細路女果段,義仔真係霸氣到喊,
    之後同佢媽媽和好又感動:~(認真推薦比未睇過既人睇#good#,btw櫻哥點解要咁早死:-(

    回覆刪除
    回覆
    1. 櫻哥咁無敵,唔死其他角色點發圍呀?

      刪除
    2. 櫻哥真係慘,又早死,最後條女又俾個仆街真理雄食埋:~( :~( :~(

      刪除
    3. 真理雄呢條仆街成日滿口仁義道德,成套漫畫咁多個主角我最憎就係佢!

      刪除
  64. 變色嫻姨今次連d藍絲都唔撐佢[sosad][sosad][sosad]
    佢一向鍾意做好人次次有乜事就出黎領功,
    但保皇果邊出事佢就鑊鑊置身事外甚至落井下石xx(xx
    例如當年禮義廉個程介南衰貪污,
    佢身為禮義廉中常委竟然未查之前就第一時間出黎插程介南仲公開叫佢辭職[369]
    所以大把禮義廉高層都憎到佢入骨,
    好心你就收撚皮啦嫻姨姨,知自己老就唔好出黎阻住地球轉啦:o) :o) :o)

    回覆刪除
    回覆
    1. 狗咬狗幾時都係最好睇!不過我睇死個死肥仔遲啲一定落到嚟禍港!

      刪除
    2. 佢一早搵施君龍就一定掂, 宜家都唔遲, 因為佢係施嘅翻版, 一樣咁冷血無情兼老馮,覺得香港欠佢, 特衰正苦最鍾意放呢D人落嚟禍港!

      刪除
    3. 最好就放多D肥仔落黎搞鳩like幫港出聲果班港豬
      到時佢地D仔女俾人搞,睇下佢地有乜感受
      like埋D on9 page仲成日講埋D歪理:o) :o) :o)

      刪除
    4. Tsang叮噹:睇呢個死肥仔同佢阿婆個相就知道乜嘢叫做面目可憎!

      刪除
    5. 小強:同呢班人講多都嫌嘥氣啦!個個雙重標準,既然咁愛國咪將自己個女嫁畀肥懷囉!再唔係收養埋佢兩婆孫添呀笨!日日飲含鉛水飲懵咗定喇班豬頭!

      刪除
  65. Happy Birthday狂小哥
    我覺得你最重要俾麟麟唱會岩D 完全係佢個style

    回覆刪除
  66. 生日快樂ar Time Time!真係Long Time No see!克勤同Joey個演唱會我都撲唔到飛ar!

    回覆刪除
    回覆
    1. 多謝豬仔!難係正常呀!淨係容祖兒啲歌迷已經夠開十場……更何況加埋克勤!

      刪除
  67. 生日有老友同愛侶相伴,真是人生樂事!祝頌安康!

    回覆刪除
  68. 睇見 Co Co 捉住你隻手, 好温馨...真的百般滋味

    回覆刪除
  69. 話咁快又快樂星期六☁。゚★神公可休息喇喂
    ☾•*◇我又可以係咁瞓覺豬呢♦・゚☆大家甜夢*❉´晚安呢

    回覆刪除
  70. CHING生日快樂,YNWA,期待你下一篇blog

    回覆刪除
    回覆
    1. 多謝,新Blog已出,有空歡迎再來啊!XDXDXD~

      刪除
  71. 自己友 , 遲黎既生日快樂 ! 祝你有個充實既32歲 !

    回覆刪除
  72. 題外話 , 真係好耐未試過咁想一個利記球員離開利物浦 , 多謝鏝肯用49M買250 !

    回覆刪除
    回覆
    1. 我覺得佢仲未可以挑戰到晏菲路過街老鼠神聖嘅地位!

      刪除
  73. 先感謝各位的祝福,有空再一一回覆大家。

    回覆刪除
  74. 我呢排都忙死少上左blog, 不過而家撤旦回歸lu...hahaha..
    祝你生日快樂, 身體愈來愈健康, 個樣愈來愈靚仔, 同姑姑愈來愈恩愛^^

    回覆刪除