2007年9月17日星期一

心情隨筆 17/09/07

8:00 am
今朝我八點鐘就起咗身,仲自己煮咗個早餐食,
呢碗自製嘅「金牌健康通粉」材料有冬菇 、白菜、瘦肉同江瑤柱,
個味道清清地,食完個感覺好舒服,食完早餐之後我落咗街,
然後就買咗份報紙同埋買定今晚嗰餐嘅餸……
哈哈~講起上嚟,都好耐冇試過親自為女朋友下廚喇!
今晚唔知點解忽然心血來潮想浪漫一下!嘻嘻~
返到屋企打開份報紙又睇到一則令人非常心噏嘅新聞,標題為【泰國布吉空難88死】。
唉~布吉近年都算得上係多災多難,先有04年海嘯,而家又發生空難,
喺呢度,衷心希望呢個世界唔好再有咁多天災人禍,
講真呀~每次睇完呢啲報導個心都會好唔舒服……

13:45 pm(豐富午餐)
太平芝麻餅乾一包 + 一杯一斤果醋

16:00 pm
喺網上睇到有人Post咗一張陳年舊相出嚟,
相中嘅呢位巨星係三、四十年代嘅著名女影/歌星周璇……
嘩~唔睇過都唔知,原來佢後生嗰陣係咁鬼靚㗎!

20:35pm(二人晚餐
 
秘製薯仔洋蔥豬扒、梅菜鯇魚片飯、蕃茄薯仔洋蔥湯
用部爛鬼手機拍出嚟個賣相雖然睇落麻麻,但自問味道係一流㗎!
咦~有位人兄好似想靜靜雞偷食喎!~XDXDXD~
呵呵呵~偷食失敗咗,就好不滿咁瞓喺我個鞋盒上面示威抗議!
咳咳~跟住落嚟係兒童不宜嘅時間, 所以小弟就為各位準備咗一部時光機……
噚晚我睇咗最新一集嘅《快樂歌喉戰》,實在有太多意想唔到嘅驚喜!
參賽者方面,就以新加坡視障歌手陳偉聯嘅表現最為突出,
佢當晚所演唱嘅一曲「火柴天堂」,真係深深觸動我嘅心靈。

喺關主方面,今集負責把守一萬蚊關卡嘅璽恩,係一位十分出色嘅實力派唱將,
佢人靚歌甜唱功又一流,係我近幾年聽過唱得最好嘅新進女歌手。

把守萬五蚊關卡嘅關主曹西平,
大家咪睇佢發晒福唱歌唱到甩晒beat就以為佢冇料到呀!
呢位大叔喺八十年代同費翔、陽帆、包偉銘畀人稱之係台灣嘅四大天王,
仲有個好巴閉嘅花朶叫做「翻版西城秀樹」,絕對係唔嘢少㗎!
登登登~有請今集嘅大魔王!佢就係我哋香港嘅情歌聖手蘇永康!
可能好多人都唔記得,其實蘇永康喺台灣向來都有啲知名度,
佢唱紅過唔少膾炙人口嘅金曲,喺當地仲有個稱號叫做「抒情歌王」,
睇完佢今集喺歌喉戰入面嘅表現,我確係少少意外,
冇諗過佢近年咁少喺公開場台唱歌都依然保持到一貫嘅高水平演出,認真係唔簡單!
我一向都幾欣賞蘇永康呢位低調嘅實力派,以前仲買過佢唔少正版唱片添!
冇記錯嘅話,本人所買嘅第一張蘇康album應該係《最深刻的愛》,
其後嘅《紅式》、《情來自有康》同《獨立宣言》我通通都有科水購入,
我覺得佢唱歌真係好鬼有味道,尤其係演繹某部分帶有爵士樂風格嘅歌嗰陣……
我夠膽講!喺香港樂壇嘅一班流行男歌手之中,
就只有蘇永康、夏韶聲同譚耀文可以handle到一啲含有Jazz/Blues元素嘅Pop Song,
但好可惜,蘇永康喺早前已經宣布咗嚟緊唔會再出廣東碟,
而譚耀文睇嚟又冇乜機會再喺音樂上有任何發展,至於夏韶聲亦總唔能夠一路咁「諳」落去……
總之一句講晒,留唔到呢三位騷味咁重嘅男歌手喺音樂圈,肯定係香港樂壇嘅一大損失!

我最愛嘅蘇永康唱片Top 5

NO 1.【紅式】
蘇永康喺1996推出嘅一張爵士好碟,比掛羊頭賣狗肉嘅【Soul Jazz】好好很多!

NO 2.【獨立宣言】
全隻碟嘅歌都好正,特別係「好來好去」、「海角天涯」同「請將音量收細」……

NO 3.【不想獨自快樂】
一張好成功嘅商業唱片,碟裡面除咗有HIT爆嘅至尊金曲「越吻越傷心」之外,
仲有三首好聽到爆嘅Side Track「提我」、「開玩笑」同「因我太好」

NO 4.【蘇永康的化妝間】
全隻碟有十一首歌,當中有十首都係合唱歌嚟,係一張好值得樂迷收藏嘅概念專輯。

NO 5.【Super Nice 新歌+精選 34首】
一口氣網羅晒蘇永康歷年嚟嘅多首國語好歌,係一張大件夾抵食嘅新歌+精選。

我最愛嘅蘇永康靚歌 Top 20
第一位 - 因我太好  試聽
第二位 - 從來未發生(管弦版)試聽
第三位 - 失眠  試聽
第四位 - 天知道(合唱:譚耀文試聽
第五位 - 誰肯認命  試聽
第六位 - 壞女人  試聽
第七位 - 今晚祝你做個好夢  試聽
第八位 - Sorry 試聽
第九位 - 提我  試聽
第十位 - 好來好去  試聽
第十一位 - 沒有季節的火花(Manhattan Mix)試聽
第十二位 - 殤愛  試聽
第十三位 - 假使有日能忘記  試聽
第十四位 - 舊愛還是最美  試聽
第十五位 - 請將音量收細  試聽
第十六位 - Sol #4  試聽
第十七位 - 讓我暖一些  試聽
第十八位 - 有人喜歡藍  試聽
第十九位 - 愛情若是不用言語  試聽
第二十位 - 相遇太早(合唱:周蕙試聽

欣賞完一場咁有睇頭嘅綜藝Show,我就同昌哥、Micheal出咗去食宵夜,
昔日維港三師徒聚首一堂,啲口水直頭多到足以浸晒成個大排檔!

23:15 pm

送完阿琪搭車,一返到屋企我就即刻走入廁所沖涼洗頭,點知沖完涼一打開門……
OH!隻反斗貓又作反喇!唉~又要我做餐死!嗚嗚~

00:00 am(18/09/07
你個死仔搞完亂檔仲喺度瞓得咁招積!!!

5 則留言:

  1. 蘇永康的歌我獨愛失眠

    回覆刪除
  2. 睇咗夏韶聲演唱會DVD未呀!拍得好正呀!
    [版主回覆12/26/2007 05:07:00]
    未呀!我都唔知佢出左添!哈~搵日去CD鋪買隻睇睇先!thx~

    回覆刪除
  3. dvd165元in信和
    我是官網的mc,上去 www.dannysummer.com 發表下意見啦
    [版主回覆01/17/2007 23:27:00]好~

    回覆刪除
  4. 聞『韶聲』三月不知肉味啦
    http://youtube.com/watch?v=vuyRoQqXSJM

    回覆刪除
  5. Bo仔,我喺咪咪,現暫居軒軒園.
    有空歡迎來訪共聚..
    http://xuanxuanpopo.blogspot.hk/

    回覆刪除