狂小子"Time Is Changing ": 細看足球風雲

記得喺上年年頭睇咗一齣既感動又令我十分難忘嘅電影，
呢部就係本人認為可能係本世紀最精彩嘅足球電影一球成名（Goal ！）。

《一球成名首部曲》係講述一名熱愛足球並且天才橫溢嘅年輕人Santiago Munez，

佢由最初一個無名小子，到後來畀球探發現，
再憑著佢超卓嘅球技而獲得加盟英超勁旅紐卡素嘅機會。

Santiago一開始喺紐卡素受盡球場內外嘅無數白眼，

到最後喺連番激戰中過關斬將，一舉成名，仲成為球迷心目中嘅寵兒。

喺呢部電影度除咗可以令大家欣賞到一啲客串演出嘅超級球星之外，

仲可以睇下一個年青人點樣努力去追逐夢想……
我承認喺電影中嘅某啲橋段的確係肉麻兼骨痺，
尤其係有一幕講Santiago老豆偷偷哋去咗間Pub度睇個仔比賽，
當見到Santiago入波，佢老豆就喺人群中大叫：「呢個係我個仔！」
然後喺Santiago老豆過身冇耐，Santiago喺一場重要賽事裡面射入致勝球，
跟住Santiago就對住個天向佢老豆做出一個致敬嘅手勢，
好老實講，呢種情節查實確係好鬼死老套，
但正所謂橋唔怕舊，最緊要受，總之感動到人咪得！

講返喺《Goal！》嘅最後一戰，即係紐記反勝利記奠定來季歐聯席位嘅嗰一場波……

呢個編排真係令到我呢個多年利迷相當之不滿！
哼～點解要拍利記輸而唔係拍49000輸先？而家咁樣收尾成套戲咪極之美中不足囉！
計我話，如果導演可以將最後一戰改成係反勝49000嘅話，
咁整套電影一定會變得更加完美！哈哈哈哈哈哈哈哈哈～

睇完一部扣人心弦嘅首部曲，我足足等咗成年先等到《Goal II》面世，

有好多人喺睇完《Goal II》都話呢個二部曲比唔上第一集，
仲話呢部其實只係一部硬sell皇家馬德里嘅宣傳片，

但當睇過成齣戲之後，我就完全冇呢種感覺，反而仲覺得幾好睇添！
喂～咁今集本身就係講Santiago轉投皇馬後嘅故事㗎嘛！你叫佢仲可以點寫先？
嗯～我諗應該係皇馬呢隊波星味太濃嘅關係，先會令人有呢個錯覺啫！
好似上集咁，就唔會有人走出嚟話《Goal！》係一套歌頌紐卡素嘅廣告片。

呢套《Goal II》整體嚟講都算唔錯，感情／友情／親情線乜都有，段段都寫得幾好，

喺感情線上，Santiago一度迷失，但佢到底有冇背住女友同個西班牙大口妹搞埋呢？
套戲就冇明確交代到，而Santiago同佢女友Roz嘅嗰段感情線……
唔知點解就令我諗起我同女朋友嘅一啲故事，咁當然100%唔包括偷食嗰段啦！呵呵～

喺友情線方面，我自己幾鍾意有一段……

講另一位男主角Harris因為經常夜蒲，所以搞到比賽嗰陣成日失準，
往後仲畀Santiago搶埋個正選位，Harris畀人貶為後備，非常不滿，
但係勢估唔到Santiago第一場正選就畀人紅牌出場，後嚟仲受埋傷，
令到Harris好快搶返個正選位，仲火速回勇為球隊射入多個致勝球。

再一次失去正選嘅Santiago並冇因此而放棄自己，

喺傷癒復出後佢好快就回復比賽狀態，仲成為球隊嘅後備殺手。

Santiago同Harris都咁fit，搞到皇馬領隊好鬼頭痕……

喺同一位置上，究竟出Harris定係Santiago好呢？
而去到決賽前夕，Santiago為咗大局居然就要求領隊將佢列入後備名單，
因而令Harris可以順利擔正正選，但其後皇馬喺比賽中落後，
領隊就決定將Santiago換埋入去同Harris一齊並肩作戰，喺成套戲當中我最鍾意就係呢一幕。

至於喺親情線方面，我覺得Santiago同佢阿媽／細佬相認嗰度就拍得稍為趕咗啲，

求其草草幾筆就帶過咗，認真係嘥料！

總括嚟講，《Goal II》嘅內容基本上都算幾豐富，佢唔只提到有關球員嘅私生活同傷患問題，

仲有描寫到隊友之間嘅一啲心病，喺各方面都絕對唔比《Goal！》差。

只不過呢～我對《Goal II》個Ending就有少少意見，

喺結尾部分，當碧咸射入致勝球，套戲居然就即刻起字幕……
請問使唔使趕收工趕成咁呀？Santiago同Roz條感情線都仲未交代返喎！
仲有一點就係碧咸作為一個客串角色嚟講，風頭確實係有啲過大，直頭成個第三男主角咁！
咁都未止呀～連喺《Goal II》張電影海報度，碧咸嘅位置都幾乎同兩位主角平起平坐，
而喺最近，外國嗰面仲聽聞話喺《Goal III》入面碧咸嘅戲份將會比先前嗰兩集更多，
又踢波又做Model，家吓連電影界都畀你撈埋！咸哥～你呢啲係咪叫做恃靚行兇呀？