自問係一個好好嘅聆聽者，但就絕對唔會係嗰種24小時On Call嘅老友，喺我心目中，朋友只係一班用嚟傾計同玩嘅對象，唔使幫我擋兩刀，唔好問我借錢，同樣我亦都唔會問你借，我認為做朋友（尤其係男人）千祈唔好涉及金錢、利益同女人，當個Friend有煩惱嗰陣，你只需要安份咁去做一個垃圾筒，咁就已經好足夠。
我一向都唔鍾意將「朋友」兩個字搞到咁鬼複雜，平淡如水嘅友情向來都係最靠得住，或者係個性問題啦！經歷亦都係一個重要因素，我從小就習慣咗單拖去處理啲麻煩事，講真呀～細個嗰陣邊度會有人得閒理你講乜㗎？再加上當時老豆老母又長時間唔喺身邊，而我又唔想嫲嫲擔心，久而久之，就會漸漸習慣孤身作戰，仲會變得好討厭去同其他人交代一切，唔開心嘅時候，我只係想匿埋自閉休息下，有好多朋友成日都話突然會搵我唔到，唔知我到底發生咗乜事，但冇辦法，我份人就係咁，基本上我當佢哋每一個都係朋友，怪就怪小弟實在係太講心情同太需要私人空間喇！同埋喺朋友上我通常都會分得好清楚，玩嘅朋友、傾心事嘅朋友、食飯嘅朋友、網上嘅朋友……我都會分得好明確，乜人係只適合群埋一齊吃喝玩樂，乜人係可以推心置腹，我自己心中有數。我想講，一啲平日比較少聯絡嘅朋友，例如係：盛恩、家敏、阿欣、阿龍同一班小學同學，有時候我真係唔係有心唔聽佢哋電話㗎！只係咁橋撞啱嗰排負能量超標，先唔想出去影響人哋嘅情緒啫！
我冇可能逐家逐戶拍門去解釋，只有等唔明白嘅人慢慢去明白同了解我，哈～相信喺而家班朋友入面，應該得返小玲算係最了解我，可能係自細認識嘅關係啦！其次就係阿龍同柏盛，而華Dee同我認識嘅時間雖然唔係好長，但唔知點解就異常咁夾，至於Miss黃，我哋都係好好嘅朋友，但作為後輩我就唔想再加深佢嘅煩惱，所以我每次見親佢都一定唔會將心裡面唔開心嘅嘢同佢講，等佢可以全心全意咁去同病魔搏鬥。
哈～講開又講呀！喺呢個世界上曾經都有兩個朋友係好了解我嘅！但可惜我哋經已冇機會再見面，時至今日，我仲係唔能夠接受佢哋唔喺度呢個事實，之但係有啲嘢發生咗就冇辦法時光倒流，呢個係我哋凡人一世都唔會改變得到嘅命運。
坦白講，喺我嘅現實社交圈子入面，真係冇乜朋友知我竟然會有寫Blog呢個咁姣嘅習慣，網友就反而好多都會知，不過我又覺得……查實佢哋睇唔到咪仲好，有時有好多嘢，又的確係唔使下下講到咁白嘅！
諗返起以前同咁多位老友一齊酒醉落魄嘅日子，我都會感到好心甜，呢一點一滴，我係今生今世都唔會忘記，我知道我肯定唔會係一位好稱職嘅朋友，但希望你哋都可以體諒一下我呢隻「冇尾飛陀」啦！
好～各位朋友，嘢我就唔再多講喇！大家心照不宣啦！Good Luck to all of us！
沒有留言:
不接受新留言。